TikTok-taǵy alaıaqtyq: Shymkentte ondaǵan adamdy aldaǵan kúdikti ustaldy

ShYMKENT. KAZINFORM – Shymkentte polıtsııa ınternet-alaıaqtyqtyń birqatar deregine kúdikti azamattyń zańsyz áreketin áshkereledi.

Tergeý málimetine sáıkes, kúdikti TikTok áleýmettik jelisi arqyly alaıaqtyq shema uıymdastyrǵan. Arnaıy ashylǵan paraqshada ol júrgizýshi kýáligin jedel ári qıyndyqsyz alyp berýge kómektesetin jalǵan qyzmetterdi belsendi túrde jarnamalaǵan.

Klıentterdi tartý úshin senimdi kórinetin beınerolıkter men jarnamalyq jazbalar paıdalanylǵan.

Bul ýádege sengen azamattar kórsetilgen shottarǵa aqsha aýdaryp otyrǵan. Saldarynan 45-ke jýyq qazaqstandyq zardap shegip, keltirilgen jalpy shyǵyn 20 mıllıon teńgeden asqan.

ІІM baspasóz qyzmeti málimetinshe, jedel is-sharalar barysynda kúdikti ustalyp, qamaýǵa alyndy. Qazirgi tańda tergeý áreketteri júrgizilip, onyń ózge de qylmystyq epızodtarǵa qatysy bar-joǵy tekserilip jatyr.

Polıtsııa zańda belgilengen tártipten tys qujattardy rásimdep berýdi usyný alaıaqtyqtyń aıqyn belgisi ekenin eske saldy. Sondaı-aq azamattardy qyraǵylyq tanytyp, kúmándi onlaın-jarnamalarǵa senbeýge jáne beıtanys adamdarǵa aqsha aýdarmaýǵa shaqyrdy.

Aıta keteıik, ІІM krımınaldyq polıtsııa departamentiniń qyzmetkerleri halyqaralyq izdeýde júrgen 40 jastaǵy er adam men onyń 45 jastaǵy jubaıyn Jambyl oblysynyń aýmaǵynda quryqtady.