TikTok-ta jyl saıynǵy #Qazaqstanmuǵalimderi baıqaýy bastaldy

ASTANA. KAZINFORM — Qysqa beınerolıkter jasaý men kórýge arnalǵan TikTok jetekshi platformasy tórtinshi jyl qatarynan ótetin #Qazaqstanmuǵalimderi baıqaýyn iske qosty. Bul týraly Ǵylym jáne joǵary bilim mınıstrligi jarııalady. 

Bul bastama aıasynda búkil eldiń pedagogteri óz pánderi boıynsha qysqa, tanymdyq beıneformatta bilimderimen bólise alady.

Bastamanyń dástúrli seriktesteri — QR Oqý-aǵartý mınıstrligi men QR Ǵylym jáne joǵary bilim mınıstrligi. Mınıstrlikterdiń qoldaýy platformanyń keń aýdıtorııa arasynda bilimdi nasıhattaýdaǵy mańyzyn atap kórsetip, TikTok-taǵy ustazdar qaýymdastyǵynyń damýyna úles qosyp keledi.

Tórt jyl ishinde baıqaý arqasynda Qazaqstanda mektep muǵalimderin, kolledj oqytýshylaryn jáne joǵary oqý oryndarynyń professorlyq-oqytýshylyq quramyn biriktirgen bilim berý kontentin jasaıtyn myqty qaýymdastyq qalyptasty. Jalpy beınerolıkter sany 90 myńnan asty. Burynǵy jeńimpazdar — Botagóz Omarova, Haıdar Myrzahmetov, Baıbolat Seıdahan, Evgenıı Solonıtsyn — óz mysalynda qysqa tanymdyq vıdeolardyń qyzyqty ári mıllıondaǵan qaralym jınaı alatynyn dáleldedi.

— Bul baıqaý muǵalimniń yqpaly synyp sheńberinen áldeqaıda keń ekenin kórsetti. TikTok-ta jas ta, qashyqtyq ta mańyzdy emes — ózin kórsete alatyn kez kelgen adamǵa múmkindik bar. Men aýylda tursam da, bul platforma meni óńir tóńireginen shyǵardy. Óz tájirıbeń men bilimińmen onlaın bóliskende, sen tek úıretip qana qoımaısyń — ata-analarǵa, oqýshylarǵa jáne áriptesterge óz páni men mamandyǵyna jańa kózqaraspen qaraýǵa kómektesesiń. Ár muǵalimniń TikTok-ta basqalardy shabyttandyra alatyn óz tarıhy bar dep senemin, — deıdi Alakól oblysy Dostyq aýylyndaǵy orys tili men ádebıeti pániniń muǵalimi Botagóz Omarova.

Botagóz Omarova 2023 jyly «Qazaqstan muǵalimderi» baıqaýynyń jeńimpazy atanǵan, al bıyl ol Discover List TikTok — kontent avtorlarynyń jahandyq tizimine engen alǵashqy qazaqstandyq ustaz boldy.

Baıqaýǵa qatysý úshin pedagogter men joǵary oqý oryndarynyń oqytýshylary 19 qarashaǵa deıin kem degende bir beınerolık jarııalap, joba paraqshasynda ótinim qaldyrýy jáne #Qazaqstanmuǵalimderi heshtegin qosýy qajet. Beınerolıkter tanymdyq sıpatta bolyp, avtordyń pán salasyna sáıkes kelýi tıis.

Avtordyń vıdeosy 1 000 qaralymnan asqan jaǵdaıda, onyń profıline eksklıýzıvti ramka beriledi. Al 5 000 qaralymnan joǵary jınaǵan qatysýshylar úsh iPhone 17 utysyna qatysa alady.

Jeńimpazdar aýdıtorııanyń belsendiligi men qyzyǵýshylyǵy negizinde anyqtalady. Tolyq erejeler TikTok qosymshasyndaǵy baıqaý paraqshasynda qoljetimdi.

— Bizdiń jobamyz kóptegen mindetti sheshedi: muǵalim mamandyǵyn nasıhattaıdy, pedagogterdi tsıfrlyq kontent jasaý daǵdylaryn meńgerýge yntalandyrady, ózderin erkin kórsetýge jáne aýdıtorııasyn synyptan tys keńeıtýge múmkindik beredi. Sonymen qatar mıllıondaǵan paıdalanýshyǵa bilim berý kontentin senimdi ustazdardan tikeleı alýǵa jol ashady. Bıyl da joba qazaqstandyq bilim berý salasynda jańa esimderdi ashyp, olardyń shyǵarmashylyq áleýetin kórsetýge kómektesedi dep senemiz, — deıdi TikTok kompanııasynyń Túrkııa, Shyǵys Eýropa jáne Ortalyq Azııadaǵy operatsııalyq bóliminiń basshysy Melıs Chaǵlar.

Aıta keteıik, elimizde oqýshymen birge muǵalimniń de bilim deńgeıin baǵalaıtyn platforma paıda boldy.