TikTok-ta taraǵan vıdeo: Qyzylordada mysyqqa qatygezdik kórsetken er adam jazalandy
ASTANA. KAZINFORM — 21 qyrkúıek kúni TikTok áleýmettik jelisinde er adamnyń mysyqty qınap, qatygezdik tanytqany týraly beınejazba tarady. Bul týraly Polisia.kz jazdy.
Polıtsııa qyzmetkerleri jedel túrde beınejazba boıynsha tekserý jumystaryn júrgizgen.
— Qabyldanǵan sharalar nátıjesinde janýarǵa qatygezdik tanytqan adamdy anyqtap, polıtsııa bólimine jetkizdi. Ol 43 jastaǵy Jambyl oblysynyń turǵyny Serik Ketenov bolyp shyqty. Oǵan aıyppul túrinde ákimshilik jaza taǵaıyndaldy, — delingen habarlamada.
Budan bólek, oǵan mundaı áreketterge jol bermeý týraly resmı eskertý jasaldy. Janýarǵa qatygezdik tanytý qylmystyq jaýapkershilikke ákelýi múmkin ekendigi túsindirildi.
Úı janýary tiri, zardap shekken joq.
— Polıtsııa janýarlarǵa qatygezdik kórsetýge jol berilmeıtinin eske saldy. Janýarǵa kúsh qoldaný, ony qınaý nemese zııan keltirý zańnamada belgilengen jaýapkershilikke ákep soǵady, — dep eskertti quqyq qorǵaý organynan.
Aıta keteıik, buǵan deıin elimizde úı janýarlaryn ustaý erejeleri ózgergenin jazdyq.
