TikTok-ta qumar oıyndardyń onlaın translıatsııasy qyzyp tur, qatysýshylardyń kóbi - balalar
2019 jyldan bastap zańsyz oıyn bıznesin uıymdastyrý faktileri boıynsha óndiriste 1 148 is boldy, onyń ishinde 849 adamǵa qatysty 940 is aıaqtaldy.
Qabyldanǵan aldyn alý sharalarynyń nátıjesinde sońǵy 5 jylda tirkelgen ister sanynyń 5,5 esege tómendeýi baıqalady.
Jyl saıyn anyqtalatyn zańsyz oıyn termınaldarynyń sany 16 esege – 1260-tan 76-ǵa deıin azaıdy.
Bul rette zańsyz oıyn termınaldary boıynsha qylmystyq isterdiń sany 2019 jylǵy 208-den aǵymdaǵy jylǵy 28-ge deıin, ıaǵnı 7 esege azaıdy.
Sonymen qatar, úı-jaılardy jalǵa berýshilerdi jaýapkershilikke tartý boıynsha sharalar qabyldanýda.
Astyrtyn kazıno qyzmetin toqtatýǵa baǵyttalǵan jumys sheńberinde anyqtalǵan quqyq buzýshylyqtar sanyn 2019 jylǵy 35-ten a. j. 12-ge deıin ıaǵnı, 3 esege azaıtýǵa múmkindik týdy.
Sonymen qatar, zańdy býkmekerlik keńseler atyn jamylǵan, zańsyz oıyn saıttarynyń 4 faktisi (2022 jyly – 2, bıyl – 2) anyqtaldy.
Alaıaqtar belgili býkmekerlik keńselerdiń ataýlaryn (domenderin) qosymsha abbrevıatýralar qosý arqyly ózgertken.
Atap aıtqanda, belgili býkmekerlik keńseniń atymen zańsyz oıyn bıznesin uıymdastyrý faktisi boıynsha tergeý bastaldy.
Bıyl «TikTok» jelisinde qumar oıyndardyń onlaın translıatsııasy jandandy. Aıta keteıik, qatysýshylardyń basym kópshiligi kámeletke tolmaǵandar.
Qabyldanǵan sharalardyń nátıjesinde uıymdastyrýshylardyń 177 akkaýnty anyqtaldy. Oıynshylardyń kúndelikti sany myńdaǵan adamdarmen ólshendi.
10 uıymdastyrýshyǵa qatysty 5 qylmystyq is qozǵaldy, onyń 3-i boıynsha úkimder shyqty (qalǵan isterdiń tergeýi jalǵasýda).
4 adam bas bostandyǵynan aıyrýdyń naqty merzimderine (4 jyldan) jáne 2 adam bas bostandyǵyn shekteýge (1,5 jyldan) sottaldy.
Aqparat komıtetimen jáne jeli ıesimen birlesip, «TikTok» platformasynyń jasandy ıntellektisiniń jumysy jolǵa qoıyldy, bul zańsyz kontent efırin jedel buǵattaýǵa múmkindik beredi.
Qumar oıyndardy taratatyn jańa akkaýnttar qysqa merzimde avtomatty túrde buǵattalady.
Aldyn alý sharalary sheńberinde Agenttik IT-quraldardy paıdalana otyryp, ınternet-keńistikte (jańalyqtar portaldary, blogtar, saıttar jáne áleýmettik jelilerdiń akkaýnttary) quqyqqa qaıshy mazmundy aqparatty izdeýdi júzege asyryp jatyr.
2022 jyly 5,5 myń onlaın-kazıno saıttary men akkaýnttary, bıyl – 2 myńnan asa saıt buǵattaldy.
Agenttik aqparat komıtetimen (AQDM) jáne UQK MTQ-men birlesip onlaın-kazınonyń «kóshirme» saıttaryn (jańadan qurylatyn) jedel buǵattaý týraly sheshim qabyldady, «Kıberbaqylaý» júıesindegi saıttardy buǵattaý algorıtmi 14 táýlikten 1 kúnge deıin jeńildetildi.
