TikTok-ta qumar oıyn uıymdastyrǵandar 4 aıda 13 mln teńge tapqan - QMA

ASTANA. QazAqparat - Almaty turǵyndary «TikTok» áleýmettik jelisinde aqshany alý jáne utystardy bank aýdarymdary arqyly berýmen onlaın qumar oıyndardy uıymdastyrǵan, dep habarlaıdy QazAqparat.

Baspasóz qyzmetiniń habarlaýynsha, Qarjylyq monıtorıng agenttiginiń (QMA) qalalyq departamenti áleýmettik jelide zańsyz oıyn bıznesin uıymdastyrýshylardyń áreketin toqtatty.

Tergeý barysynda azamattardyń áleýmettik jelilerde 4 aı ishinde zańsyz oıyn bıznesin uıymdastyryp, 13 mıllıon teńgege jýyq somada, ıaǵnı asa iri kólemde kiris alǵany dáleldendi.

Almaty qalasynyń eki turǵyny kináli dep tanylyp, 1,5 jylǵa bas bostandyǵynan aıyryldy.

Sonymen qatar, sot zańsyz oıyn bıznesi salasynda asa iri kólemde kiris alý arqyly osyǵan uqsas quqyq buzýshylyq jasaǵan 4 tulǵaǵa qatysty isti qaralýda.