TikTok-ta bir-birin uryp-soqqan eki jas jazaǵa tartyldy
ASTANA. KAZINFORM — Jambyl oblysynda TikTok-ta tikeleı efır ótkizip, donat jınaý úshin bir-birine ádeıi dene jaraqatyn salǵan eki 19 jastaǵy turǵyn jaýapqa tartyldy.
Oqıǵa áleýmettik jelilerge júrgizilgen monıtorıng barysynda anyqtalǵan. Ákimshilik isterdiń materıaldaryna tikeleı efırdiń beınejazbasy, hattamalar jáne qatysýshylardyń túsiniktemeleri engizilgen.
Baızaq aýdandyq sotynyń málimetinshe, shilde aıynda boıjetken men jigit Sarykemer aýylyndaǵy úıden TikTok-ta tikeleı efır júrgizgen. Kórermen sanyn arttyryp, donat alý maqsatynda olar ádeıi bir-birine kúsh qoldanyp, balaǵat sózder aıtqan.
Sot olardyń áreketin Ákimshilik quqyq buzýshylyq týraly kodekstiń 434-babynyń 1-bóligi boıynsha usaq buzaqylyq dep tanydy. Sot otyrysynda eki qatysýshy da kinásin moıyndady. Boıjetken jasaǵan áreketine ókinish bildirip, materıaldyq jaǵdaıynyń qıyndyǵyn alǵa tartyp, ózine qoǵamdyq jumystar taǵaıyndaýdy surady. Al jigit aıyppulmen shektelýdi ótindi.
Jaza taǵaıyndaý kezinde sot olardyń kinásin moıyndaýyn, ókingenin jáne jas ekenin eskerdi. Qyzǵa qatysty jaýapkershilikti aýyrlatatyn mán-jaılar anyqtalǵan joq.
Sot sheshimimen boıjetkenge 30 saǵat qoǵamdyq jumys taǵaıyndaldy, al jigitke 86 myń teńge kóleminde aıyppul salyndy.
Qaýly ázirge zańdy kúshine engen joq.
Aıta keteıik, Jambyl oblysynda 25 myń teńge úshin TikTok-ta alaıaqtyq jasaǵan áıel 2,5 jylǵa sottaldy.
