TikTok-ta beıádep sóz aıtqan Taldyqorǵan turǵynyna aıyppul salyndy
ASTANA.KAZINFORM — Áleýmettik jelilerge kezekti monıtorıng júrgizý barysynda polıtsııa qyzmetkerleri TikTok platformasyndaǵy tikeleı efırde beıádep sózder qoldaný deregin anyqtady. Quqyq buzýshy Taldyqorǵan qalasynyń 44 jastaǵy turǵyny bolyp shyqty. Bul týraly Polisia.kz jazdy.
Tekserý barysynda áıeldiń buǵan deıin de osyǵan uqsas quqyq buzýshylyqtar úshin eki ret ákimshilik jaýapkershilikke tartylǵany belgili boldy. Alaıda qabyldanǵan sharalarǵa qaramastan, ol qoǵamdyq tártipti qaıta buzǵan.
— Atalǵan derek boıynsha polıtsııa qyzmetkerleri qajetti materıaldardy jınaqtap, sotqa joldady. Іsti qaraý nátıjesinde áıel kináli dep tanylyp, ákimshilik jaýapkershilikke tartyldy. Sot onyń kámeletke tolmaǵan jas balalarynyń bar ekenin eskere otyryp, ákimshilik aıyppul túrindegi jaza taǵaıyndady, — delingen habarlamada.
Polıtsııa áleýmettik jeliler zań talaptarynan tys keńistik emes ekenin eskertedi. Kópshilikke arnalǵan tikeleı efırler barysynda jalpyǵa ortaq ádep normalaryn saqtaý qajet.
— Beıádep sózder qoldaný zań aıasynda jaýapkershilikke ákep soǵady, — dep eskertti ІІM-nen.
Áleýmettik jelilerge monıtorıng júrgizý, ınternet keńistigindegi quqyq buzýshylyqtardy anyqtaý jáne olardyń jolyn kesý jumystary turaqty túrde jalǵasady.
Buǵan deıin Qyzylordada mysyqqa qatygezdik kórsetken er adam jazalanǵanyn jazǵan edik.
