TikTok pen YouTube Ulybrıtanııada jasóspirimder úshin áli de qaýipti dep tanyldy
ASTANA. KAZINFORM — Ulybrıtanııada TikTok pen YouTube platformalary balalar úshin jetkilikti deńgeıde qaýipsiz emes dep baǵalanyp otyr. Buǵan kámeletke tolmaǵandarǵa zııandy kontent usynýy múmkin algorıtmder sebep bolǵan, dep habarlaıdy Anadoly.
Bul týraly brıtandyq baılanys salasyn retteýshi Ofcom jarııalaǵan esepte aıtylǵan.
Qujatqa sáıkes, platformalar balalardy qorǵaý baǵytynda eleýli ózgerister engizbegen. Al olardyń algorıtmderi áli de jasóspirimderge yqtımal zııandy kontentti usynýy múmkin.
Buǵan deıin retteýshi Meta, Roblox, Snap, TikTok jáne YouTube sekildi iri áleýmettik jelilerden sáýir aıyna deıin balalardy qorǵaý sharalaryn kúsheıtýdi talap etken.
Meta, Roblox jáne Snap qosymsha qaýipsizdik quraldaryn engizýge kelisken.
Saýalnama nátıjesine sáıkes, 11–17 jas aralyǵyndaǵy jasóspirimderdiń 70%-y qorqynyshty nemese zııandy kontentke tap bolǵanyn aıtqan. Alaıda olardyń tek 15%-y bul týraly eresekterge habarlaǵan.
Sonymen qatar saýalnamaǵa qatysqandardyń 51%-y foto, pasport nemese basqa qujat arqyly jasyn rastaýǵa májbúr bolǵanyn málimdegen.
Eske salsaq, buǵan deıin EO Meta-ny áleýmettik jelilerde balalardy qorǵaý erejelerin buzdy dep aıyptady.
