TikTok pen YouTube Qazaqstan zańnamasynyń talaptaryn saqtaýǵa mindetti – vıtse-mınıstr
ASTANA. KAZINFORM – Qazaqstanda jumys isteıtin TikTok, YouTube jáne basqa da tsıfrlyq platformalar ulttyq zańnama talaptaryn, sonyń ishinde jasandy ıntellekt kómegimen jasalǵan kontentti taratýǵa qatysty normalardy saqtaýǵa mindetti. Bul týraly QR Jasandy ıntellekt jáne tsıfrlyq damý vıtse-mınıstri Baqtııar Muhametqalıev málim etti.
Onyń aıtýynsha, bul talaptar kontent avtorlaryna ǵana emes, Qazaqstan aýmaǵynda qyzmet kórsetetin tsıfrlyq platformalarǵa da qatysty.
– TikTok Qazaqstanda resmı túrde jumys isteıdi. Basqa platformalardyń elimizde keńsesi bolmaýy múmkin. Degenmen zańdy tulǵa retinde olar da Qazaqstan zańnamasynyń talaptaryn saqtaýǵa mindetti, – dedi vıtse-mınıstr.
Baqtııar Muhametqalıevtiń aıtýynsha, jasandy ıntellekt arqyly jasalǵan kontentti tańbalaý saılaý naýqany kezinde ǵana emes, kúndelikti ómirde de mańyzdy. Sebebi sońǵy ýaqytta JI kómegimen jasalatyn jalǵan aqparat pen alaıaqtyq áreketter kóbeıip keledi.
Eske salaıyq, Qazaqstannyń strategııalyq zertteýler ınstıtýty (QSZI) alańynda búgin saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
