TikTok pen Instagram endi psıhıkalyq densaýlyqqa tıgizetin zııan týraly eskertedi
ASTANA. KAZINFORM — Nıý-Iork bıligi TikTok pen Instagram-dy qosa alǵanda, iri áleýmettik jelilerge jańa talaptar engizdi. Qol qoıylǵan zańǵa sáıkes, platformalar paıdalanýshylardy, ásirese jastardy, áleýmettik jelilerdiń psıhıkalyq densaýlyqqa tıgizýi múmkin zııany týraly aldyn ala eskertýi tıis. Bul týraly Dexerto basylymy habarlady, dep jazdy 24 kg.
Atalǵan talap áleýmettik jelilerdi shamadan tys paıdalanýǵa ıtermeleýi múmkin fýnktsııalarǵa qatysty. Olardyń qataryna sheksiz lenta, beıneniń avtomatty túrde oınatylýy jáne algorıtmdik usynystar jatady. Eger platformada osyndaı múmkindikter bolsa, ol mindetti túrde arnaıy eskertý habarlamalaryn kórsetýi qajet.
Zańnyń oryndalýyn shtattyń bas prokýrory qadaǵalaıdy. Ol azamattyq talap-aryz túsirip, árbir zań buzýshylyq úshin 5 myń dollarǵa deıin aıyppul salý quqyǵyna ıe.
Nıý-Iork shtatynyń gýbernatory Ketı Hoýkýldyń málimdemesine sáıkes, jasóspirimderdiń shamamen jartysy áleýmettik jeliler olardyń óz dene bitimin qabyldaýyna keri áser etetinin aıtqan. Al áleýmettik jelini belsendi qoldanatyndar ózderiniń psıhıkalyq jaǵdaıyn qanaǵattanarlyqsyz dep baǵalaý jaǵynan eki ese jıi kórsetkish kórsetken.
Eske sala keteıik, buǵan deıin TikTok AQSh-taǵy jumysyn jalǵastyrý úshin ınvestorlarmen kelisimge qol qoıdy.