TikTok kreatıvti qazaqstandyqtarǵa qoldaý kórsetedi

ALMATY. QazAqparat – TikTok elimizde kreatıvti ıdeıalary bar talanttardy oqytý men damytýǵa baǵyttalǵan baǵdarlamasyn jarııalady. Bul týraly Shyǵys Eýropa men Azııadaǵy TikTok PR-dırektory Krıstına Eremeeva málim etti, dep habarlaıdy QazAqparat tilshisi.

Krıstına Eremeevanyń dereginshe, byltyr Shyǵys Eýropada jańashyl jastardy qoldaýǵa arnalǵan qor ashylǵan. Ol tanymdyq jáne tyń serpin beretin mazmundaǵy kontent avtorlaryna syıaqy beredi.

«Biz Qazaqstandaǵy kreatıvti jastardy qoldaımyz. Bizde talanttardy damytý baǵdarlamasy da bar. Joba aıasynda avtorlarǵa sapaly kontent jasaýdy, sol arqyly aqsha tabýdy úıretemiz. Qyzyqty jáne sapaly vıdeo túsiretin jastarǵa álemdik brendtermen yntymaqtastyq ornatýyna kómektesemiz», - dedi TikTok PR-dırektory Krıstına Eremeeva.

Buǵan deıin Shyǵys Eýropadaǵy TikTok ókildiginiń dırektory Oleg Sokolov Syrtqy ister mınıstriniń orynbasary Almas Aıdarovpen kezdesý barysynda Qazaqstanmen yntymaqtastyqty keńeıtýge nıetti ekenin jetkizgen edi.

Al ótken jyly Prezıdent Qazaqstan halqy Assambleıasy usynǵan tarıhty TikTok platformasy arqyly dáripteý usynysyn qoldaǵan bolatyn.

Taıaýda Tsıfrlyq damý mınıstri Baǵdat Mýsın TikTok pen YouTube kóretinder úshin tarıfti kóterýdi usyndy.

Búgingi tańda TikTok platformasyna 7 mıllıonnan astam qazaqstandyq qosylǵan.