TikTok qosymshasy qazaq tiline aýdarylady

ASTANA. QazAqparat – TikTok áleýmettik jelisi Astana men Almatyda keńselerin ashady. Bul týraly Shyǵys Eýropadaǵy TikTok Global Business Solutions dırektory jáne TikTok Kazakhstan kompanııasynyń bolashaq basshysy Anastasııa Panına aıtty, dep habarlaıdy QazAqparat tilshisi.

«Qazaqstandaǵy aýdıtorııa shyǵarmashylyqqa beıim jáne adamdar óz úndeýlerin jetkizý úshin osy platformany paıdalanady. Munda jańa kontent jasaıtyn kóptegen mýzykanttardy, muǵalimderdi, jas analardy kórip otyrmyz. Biz platforma retinde qaýymdastyqqa jaqyn bolǵymyz keledi, sondyqtan osy kúzde Qazaqstanda ókildik ashamyz. Biz bilim berý uıymdarymen, memleketpen kóbirek jobalar shyǵarǵymyz keledi, platformanyń kontentin barynsha qyzyqty ári paıdaly etemiz», - dedi Anastasııa Panına Astana Media Week medıaforýmynda tilshilerge bergen suhbatynda.

Sonymen birge A. Panına qosymshanyń qazaq tiline aýdarylatynyn rastady jáne TikTok-ty bilim berý maqsatynda kreatıvti paıdalaný mysaldaryn keltirdi.

«Bizde kreatorlardy damytý baǵdarlamasy bar, onda biz qandaı avtorlardyń aýdıtorııany qyzyqtyratynyn qarastyramyz jáne olarǵa platformanyń barlyq quraldarymen tanysýǵa múmkindik beremiz. Biz bilim berý baǵdarlamalaryn jańa deńgeıge kóterýge kómektesemiz. Mysaly, hımııa pániniń muǵalimi Ulan Úsenov hımııa týraly áńgimeleıtin beınerolıkter jasaıdy, eksperımentter júrgizedi, mýzyka qoıady. Bul kóptegen muǵalimder úshin shynymen shabyttandyrarlyq. TikTok Qazaqstanda óte tanymal, óıtkeni aýdıtorııasy óte kreatıvti», - dedi Anastasııa Panına.

Aıta keteıik, Astana Media Week 26-28 qazan kúnderi ótedi. Onda 150 otandyq jáne halyqaralyq spıkerlerdiń qatysýymen 30-dan astam is-shara ótedi.