TikTok qoldanýshylardyń ál-aýqatyn jaqsartý úshin jańa quraldardy iske qosty

ASTANA. KAZINFORM —  Qysqa vıdeolardy jasaý jáne kórý boıynsha jetekshi platforma — TikTok qoldanýshylardyń tsıfrlyq ál-aýqatyn qamtamasyz etý jáne qoldaý maqsatynda birqatar jańa fýnktsııalardy iske qosty, dep jazdy AZERTADJ.  

Jańalyqtar úsh negizgi baǵytty qamtıdy: jasóspirimderdiń qaýipsizdigi, avtorlardy qoldaý jáne qaýymdastyqty senimdi tsıfrlyq orta qurýǵa tartý.

TikTok qoldanýshylar shabyt alyp, shyǵarmashylyǵymen bólisip, jańalyqtar ashatyn qaýipsiz jáne kreatıvti keńistik qalyptastyrýdy jalǵastyrmaq. Jańa fýnktsııalar paıdalanýshylardyń qaýipsizdigin qamtamasyz etip qana qoımaı, sonymen qatar tsıfrlyq mádenıetti sanaly túrde qalyptastyrýǵa baǵyttalǵan — munda árbir qoldanýshy ózin erkin, senimdi ári qorǵalǵan sezine alady.

Jasóspirimder men olardyń ata-analary úshin qaýipsizdik

TikTok jasóspirimderdiń akkaýnttary úshin 50-den astam qaýipsizdik fýnktsııalary men baptaýlaryn usynady. Buǵan qosa, ata-analarǵa arnalǵan «Otbasylyq baptaýlar» atty baqylaý quraly da keńeıtildi:

• Beıne, hıkaıa nemese foto jarııalanǵan kezde ata-analarǵa avtomatty túrde habarlama jiberý. Bul — ata-ana men bala arasynda ne jarııalanyp jatqany jaıly dıalog qurýǵa múmkindik beredi, jeke keńistikke qysymsyz aralasý úshin.

• Jasóspirimniń qupııalylyq baptaýlaryn kórý múmkindigi (16-17 jas aralyǵy): mysaly, basqa qoldanýshylar onyń vıdeolaryn júkteı ala ma, jazylýshylarynyń tizimi ashyq pa, qyzyǵýshylyq tanytqan taqyryptary qandaı.

Tsıfrlyq ál-aýqatty qoldaý

TikTok tsıfrlyq tehnologııalar adamnyń damýyna, shabyt alýyna jáne jaıly sezinýine kómektesý kerek dep esepteıdi. Osyǵan baılanysty sarapshylarmen jáne TikTok Jastar keńesimen birlesip «Tsıfrlyq ál-aýqat mıssııalary» atty bastama ázirlendi — bul tsıfrlyq ádetterdi saýatty túrde qalyptastyrýǵa kómektesetin qysqa tapsyrmalar.

Birinshi toptamada paıdalanýshylar TikTok-ta ál-aýqatty qoldaıtyn burynnan bar fýnktsııalarmen tanysady, mysaly:

«Uıqy ýaqyty», «Ekran ýaqyty», «Otbasylyq baptaýlar», «Qaýipsizdik ortalyǵy», «Kilt sózderge súzgi». Bul tapsyrmalardy oryndaǵany úshin paıdalanýshylar arnaıy belgiler alady.

Sonymen qatar, TikTok qosymshanyń ishinde jańa bólim jasaýda. Bul bólimde tynys alý jattyǵýlary, tynyshtandyratyn aýdıo, ekran ýaqytyn basqarý quraldary jáne taǵy basqa tsıfrlyq ál-aýqatqa qoldaý kórsetetin múmkindikter jınaqtalady.

Kontent avtorlaryn qoldaý

Kontent jasaýshylar — TikTok platformasynyń júregi. Olar trend qalyptastyryp, aýdıtorııany tartý arqyly qaýymdastyqty damytady. Avtorlar ózderin qaýipsiz jáne senimdi sezinýi úshin, kelesi jańa quraldar iske qosyldy:

• Avtorlardy qoldaý rejımi — qajetsiz jáne qorlaıtyn pikirlerdi súzgileý múmkindigi.

• TikTok LIVE-ta sózder, tirkester men emodzılerdi jappaı buǵattaý.

• Content Check Lite — vıdeony jarııalamas buryn onyń basqa qoldanýshylarǵa usynylmaı qalýy múmkin ekenin aldyn ala tekserý quraly.

• Avtorlarǵa arnalǵan kiris jáshigi — 10 000 jazylýshysy bar kreatorlar úshin «oqylmaǵan», «mańyzdy» hattar qoıyndylary paıda bolady. Jıi qoıylatyn suraqtarǵa avtojaýaptar jáne jedel jaýap úlgileri ornatýǵa bolady.

• Avtorlyq chat-bólme — avtorlar eń belsendi jazylýshylarymen tikeleı baılanysa alady. Bul múmkindik 10 000-nan astam jazylýshysy bar, jasy 18-den asqan jáne «Sýperjazylý» nemese «Avtor translıatsııasynyń fan-klýby» fýnktsııasy qosylǵan qoldanýshylarǵa ǵana qoljetimdi. Kontent TikTok qaýymdastyq erejelerine saı bolýy tıis.

Bul múmkindikter avtorlarǵa óz aýdıtorııasyna nazar aýdaryp, shyǵarmashylyǵyna tolyq mán berýge múmkindik beredi.

TikTok ókilderiniń aıtýynsha, bul jańashyldyqtar jasóspirimder, ata-analar, sarapshylar men azamattyq qoǵam ókilderiniń pikirleri eskerile otyryp ázirlengen. Maqsat — platformany barsha úshin qaýipsiz ári ashyq etý.

TikTok týraly

TikTok — qysqa vıdeolar jasaýǵa arnalǵan jetekshi qosymsha. Onyń mıssııasy — adamdardy shabyttandyryp, shyǵarmashylyqqa jeteleý jáne qýanysh syılaý.

Eske sala keteıik, buǵan deıin TikTok Eýroodaqtyń jeke derekterdiń Qytaıǵa jiberilýine qatysty salǵan 530 mıllıon eýro kólemindegi aıyppulymen kelispeı, sotqa shaǵymdanatynyn málimdegen edi.