TikTok Qazaqstandaǵy bızneske tsıfrlyq platformanyń yqpaly jónindegi zertteý nátıjesin jarııalady
ASTANA. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarın Reseı, Shyǵys Eýropa, Ortalyq Azııa jáne Mońǵolııa elderi boıynsha TikTok kompanııasynyń memlekettik organdarmen jáne korporatıvtik baılanystar jónindegi dırektory Sergeı Sokolovpen kezdesti.
Kezdesýde TikTok pen «Atameken» ulttyq kásipkerler palatasy birlesip júrgizgen zertteý nátıjeleri tanystyryldy. Zertteý Qazaqstanda tsıfrlyq platformalardyń kásipkerlikke tıgizetin yqpalyn baǵalaýǵa arnalǵan. Saýalnamaǵa eldiń 20 óńirinen 300-den astam shaǵyn jáne mıkro bıznes ókilderi qatysty. Buǵan deıin osyndaı zertteýler TikTok tarapynan AQSh, Ulybrıtanııa, Meksıka jáne Saýd Arabııasynda da júrgizilgen.
Eki jyl buryn Memleket basshysy men platformanyń bas dırektory kezdesken bolatyn.
«Atameken» UKP prezıdıýmynyń tóraǵasy Raıymbek Batalov TikTok-pen áriptestik naqty nátıjeler berip jatqanyn atap ótti.
Máselen, «Bir ónim – bir aýyl» jobasy aıasynda kásipkerler TikTok quraldaryn paıdalanyp, óz ónimderin onlaın ilgeriletý jáne satylymdy arttyrý tásilderin úırendi. Zertteý nátıjeleri bıznes belsendiligi men qarjylyq kórsetkishterdiń TikTok-taǵy jumysqa tikeleı baılanysty ekenin kórsetti.
«Apta saıyn kontent jarııalaıtyn ár segizinshi kompanııalardyń tabysynyń jartysynan astamyn dál osy platformadan tabady. Al jalpy 63% kásiporyn jyldyq tabysynyń kem degende 5%-y TikTok arqyly qalyptasatynyn aıtty», — dedi Raıymbek Batalov.
«Damý» qorymen birlese otyryp, kásipkerlerge TikTok quraldaryn tıimdi paıdalaný boıynsha oqytý baǵdarlamasyn keńeıtý josparlanýda. Sonymen qatar Raıymbek Batalovtyń aıtýynsha, shaǵyn bıznestiń damýyna zamanaýı tsıfrlyq múmkindikterdi keńinen engizý – «Atameken» palatasynyń basty mindetteriniń biri. Bul baǵyt Úkimetpen birlesip ázirlenip jatqan qarjylyq, qarjylyq emes jáne ınfraqurylymdyq qoldaý sharalarymen qatar, TikTok sekildi iri halyqaralyq platformalardyń tájirıbesin qamtıdy.
Sergeı Sokolovtyń aıtýynsha, Qazaqstan – aımaqtaǵy eń jyldam damyp kele jatqan naryqtardyń biri.
«TikTok múmkindikterin paıdalaný áleýeti munda áli tolyq ashylǵan joq. Biz "Atamekenmen" jáne memlekettik organdarmen birlese otyryp, bıznestiń tsıfrlandyrý deńgeıin jańa satyǵa kóterýge daıynbyz», — dedi ol.
Zertteý derekterine sáıkes, TikTok-ta eń joǵary nátıjelerge shyǵarmashylyq jáne qyzmet kórsetý salasyndaǵy kásiporyndar — qonaq úı jáne demalys ındýstrııasy, oıyn-saýyq, sulýlyq pen densaýlyq qyzmetteri kórsetip otyr.
Bilim berý jáne týrızm baǵytyndaǵy kontent te suranysqa ıe — qazaqstandyq muǵalimderdiń, mádenı jáne týrıstik jobalardyń beınejazbalary mıllıondaǵan qaralym jınaǵan.
Kezdesýde tsıfrlyq qaýipsizdik, onlaın orta mádenıeti men turaqty damý máselelerine de erekshe nazar aýdaryldy. Bul baǵyttar ýákiletti organdarmen birlese júzege asyrylady.
Serik Jumanǵarın TikTok bastamalary men zertteý nátıjelerin oń baǵalap, Ulttyq ekonomıka mınıstrliginiń kásipkerlik blogy osy baǵyttaǵy jumystarǵa qoldaý kórsetýge daıyn ekenin atap ótti.
Aıta keteıik, buǵan deıin qazaqstandyq bıznes TikTok-ta qansha tabys tabatyny jarııalandy.