TikTok Qazaqstanda platformanyń jabylýy týraly Aıda Balaevanyń sózine jaýap berdi
ASTANA. KAZINFORM – TikTok resmı ókili Mádenıet jáne aqparat mınıstri Aıda Balaevanyń Qazaqstan aýmaǵynda platformanyń jabylýy múmkin degen pikirine túsinikteme berdi.
«Biz QR Mádenıet jáne aqparat mınıstrliginiń eldegi TikTok-ty buǵattaý múmkindigin qarastyryp jatqanyna tań qaldyq, óıtkeni mınıstrlik Qazaqstandaǵy Naýryz onlaın festıvali, qysqa beınefılmder baıqaýy sııaqty kóptegen bastamalarymyzdy belsendi qoldap kelgen edi», — dep atap ótti platformanyń resmı ókili.
Spıkerdiń aıtýynsha, ótken jumada mınıstrlik ókili Almatyda ótken is-sharada sóz sóılep, TikTok-ty mádenıet pen basqa da paıdaly kontentti nasıhattaýǵa kómektesetin platforma retinde maqtaǵan.
«Qaýipsizdikke, ásirese jas paıdalanýshylarǵa kelsek, bul TikTok-tyń absolıýtti basymdyǵy jáne oǵan kóp kúsh jumsaımyz. Sonyń ishinde qaýymdastyq erejelerin buzatyn kontentti belsendi jáne agressıvti túrde joıamyz. 2023 jyly biz Qazaqstanda erejeni buzǵan tórt mıllıonnan astam beınerolıkti alyp tastadyq. Biz QR Mádenıet jáne aqparat mınıstrligi men Іshki ister mınıstrligin qosa alǵanda, múddeli bılik organdarymen tikeleı jumys isteımiz», - dedi spıker.
Platforma ókili sońǵy aılarda TikTok kámeletke tolmaǵan paıdalanýshylardyń qaýipsizdigine qatysty kontentti óshirý jóninde ótinish túspegenin habarlady.
«Osyǵan baılanysty jáne irgeli yntymaqtastyǵymyzdy eskere otyryp, mınıstrdiń málimdemesi dáıeksiz bolyp kórinedi. Eldegi mıllıondaǵan adamdar kún saıyn TikTok-ty shyǵarmashylyqpen bólisý, tájirıbelerin baıytý jáne tabys tabý úshin paıdalanady. Bizdiń jergilikti qaýymdastyq platformamyzdy paıdalanýdy jalǵastyrady dep úmittenemiz, al biz paıdalanýshylarymyzdyń qaýipsizdigi men ál-aýqatyn qamtamasyz etemiz», - dep qorytyndylady spıker.
