TikTok-qa 500 mln eýro aıyppul salynýy múmkin

ASTANA. KAZINFORM — TikTok-tyń bas kompanııasy ByteDance Eýropa qoldanýshylarynyń jeke derekterin Qytaıǵa zańsyz jibergeni úshin 500 mln eýrodan astam aıyppulǵa tartylýy múmkin.

Bul týraly Euronews Next habarlady.

Irlandııanyń Derekterdi qorǵaý komıssııasynyń (DPC) aqparatyna súıensek, atalǵan aıyppul Eýroodaqtyń Jalpy derekterdi qorǵaý erejesin (GDPR) buzý faktileri anyqtalǵan tergeýdiń nátıjesinde salynbaq. Tergeý barysynda TikTok-tyń ınjenerleri eýropalyq qoldanýshylardyń derekterin Qytaıda óńdegeni belgili boldy.

TikTok-tyń Eýropadaǵy negizgi retteýshisi sanalatyn Irlandııanyń DPC bul aıyppuldy sáýir aıynyń sońyna deıin resmı túrde jarııalaýy múmkin. Kompanııa bul sheshimge Irlandııa sotynda shaǵymdanýǵa quqyly.

Bloomberg agenttiginiń málimetinshe, bul soma Irlandııanyń derekterdi qorǵaý organy salǵan eń iri aıyppuldarynyń biri bolýy múmkin. Buǵan deıin Amazon kompanııasyna 2021 jyly 746 mıllıon eýro, al Meta kompanııasyna 2023 jyly 1,2 mıllıard eýro aıyppul salynǵan bolatyn.

Aıyppul TikTok-tyń AQSh-taǵy qyzmetin 2025 jylǵy 5 sáýirge deıin satý nemese el aýmaǵynan ketý mindetine qatysty talqylaýlarmen qatar kelip otyr. Eger satý kelisimi júzege aspasa, kompanııaǵa AQSh aýmaǵynda tyıym salynýy múmkin.

Euronews Next túsinikteme alý úshin TikTok kompanııasy men Irlandııanyń DPC-ine júgingen. Alaıda Irlandııa tarapynan bul másele boıynsha ázirge pikir berilmedi.

Buǵan deıin AQSh prezıdenti Donald Tramp 26 naýryz kúni ByteDance kompanııasymen TikTok-ty satý týraly kelisimge kelý úshin Qytaıǵa qarsy engizilgen qosymsha baj salyǵyn tómendetýge daıyn ekenin málimdedi.