TikTok, Instagram, YouTube: Balalarǵa zııandy aqparattardyń 592 faktisi anyqtaldy
ASTANA. KAZINFORM — Bıyl 10 aıda ınternet keńistiginde balaǵat sózder men balalarǵa zııandy aqparattardyń 592 faktisi anyqtaldy. Bul týraly Quryltaı depýtattarynyń saýalyna Mádenıet jáne aqparat birinshi vıtse-mınıstri Qanat Ysqaqovtyń jaýabynda aıtylǵan.
Onyń atap ótýinshe, mınıstrlik zańnama talaptaryn buzatyn kontentti anyqtaý jáne joıý máseleleri boıynsha onlaın-platformalarmen turaqty negizde ózara is-qımyl jasaıdy. Osy jumys aıasynda kámeletke tolmaǵandarǵa qoljetimdi kontentke, onyń ishinde beıádep sózder, qorlaý, adamnyń ar-namysy men qadir-qasıetin kemsitý, arandatýshylyq jáne ózge de destrýktıvti minez-qulyq qamtylǵan tikeleı efırlerge erekshe nazar aýdarylady.
— 2026 jylǵy 1 qańtardan 22 qyrkúıekke deıingi kezeńde mınıstrlik tarapynan ınternet keńistigindegi destrýktıvti materıaldardyń, onyń ishinde tikeleı efır barysynda balaǵat sózder men balalardyń densaýlyǵy men damýyna zııan keltiretin aqparatty ornalastyrýdyń 592 buzýshylyq faktisi anyqtaldy, — dedi Qanat Ysqaqov.
Birinshi vıtse-mınıstr jaýabyna qosa berilgen anyqtamaǵa sáıkes, anyqtalǵan faktilerdiń 71-i tikeleı efırlerdegi beıádep sózder men tresh-kontentke qatysty bolsa, 521 jaǵdaıda balanyń densaýlyǵyna, adamgershilik jáne rýhanı damýyna zııan keltiretin aqparat ornalastyrylǵan. Olardy joıý úshin ınternet-resýrstar men onlaın-platformalar dyńákimshilikterine 159 habarlama jáne uıǵarym hattary joldanǵan.
— Mınıstrlik TikTok, Instagram, YouTube jáne basqa da onlaın platformalarmen quqyqqa qaıshy kontentti jedel anyqtaý, onyń taralýyn shekteý jáne joıý tetikterin jetildirý, sondaı-aq tıisti faktiler boıynsha azamattardyń ótinishterin qaraý baǵytyndaǵy jumysty jalǵastyrady. Osyǵan baılanysty tikeleı efırlerdiń erekshelikterin eskere otyryp, naqty ýaqyt rejıminde taralatyn kontentke jedel den qoıý máseleleri boıynsha onlaın-platformalarmen ózara is-qımyldy jalǵastyrý oryndy, — dedi ol.
Buǵan deıin Іshki ister mınıstri Erjan Sádenov «tresh-strımıng» uǵymyn zańnamaǵa engizýge qatysty pikir bildirgen edi.
