TikTok EO-nyń 530 mln eýro kólemindegi aıyppulyn sotta daýlamaq
ASTANA. KAZINFORM – TikTok Eýroodaqtyń jeke derekterdiń Qytaıǵa jiberilýine qatysty salǵan 530 mıllıon eýro kólemindegi aıyppulymen kelispeı, sotqa shaǵymdanatynyn málimdedi, dep habarlaıdy TASS.
Bul týraly TikTok kompanııasynyń Eýropadaǵy syrtqy baılanystar bóliminiń basshysy Krıstın Gran habarlady.
Ol TikTok-tyń aıyppulǵa úzildi-kesildi qarsy ekenin aıtyp, kompanııanyń eýropalyq paıdalanýshylardyń derekterin saqtaý úshin Eýropada serverlik ınfraqurylymǵa 12 mıllıard eýro jumsaǵanyn atap ótti.
Sondaı-aq Gran TikTok-tyń eshqashan Qytaı bıliginen eýropalyq paıdalanýshylardyń derekterine qatysty suraý almaǵanyn jáne bul derekter eshqashan berilmegenin málimdedi.
Irlandııanyń derekterdi qorǵaý jónindegi komıssııasy TikTok servısine 530 mıllıon eýro aıyppul saldy. Bul sheshim TikTok-tyń eýropalyq paıdalanýshylardyń derekterin Qytaıǵa bergeni týraly kúdikke baılanysty qabyldanǵan. Komıssııa muny EO-nyń jeke derekterdi qorǵaý erejelerin buzý dep baǵalady.
Aıyppul Eýroodaqta TikTok tirkelgen el – Irlandııada salyndy. EO zańnamasyna sáıkes, eýropalyq paıdalanýshylardyń derekteri Eýropa aýmaǵyndaǵy serverlerde saqtalýy tıis.
TikTok bul sheshimmen kelispeı, aıyppuldy sot arqyly daýlamaq. Kompanııa derekterdi saqtaý úshin Eýropada serverlik ınfraqurylymǵa 12 mıllıard eýro ınvestıtsııa salǵanyn jáne Qytaı bıligine eshqandaı jeke derek berilmegenin málimdedi.
Aıta ketelik Qytaıdyń Saýda mınıstrligi TikTok áleýmettik jelisi boıynsha óz ustanymyn túsindirgen edi.