TikTok EO-da adam jasyn tekserý júıesin engizedi

ASTANA. KAZINFORM – TikTok aldaǵy aptalarda 16 jasqa tolmaǵan qoldanýshylardyń áleýmettik jelilerge kirýin shekteýge úndeýlerdiń artýyna baılanysty Eýropalyq Odaqta jas tekserýdiń jańa tehnologııasyn engize bastaıdy.

Sońǵy jyl ishinde EO-da pılottyq synaqtan baıqatpaı ótkizilgen júıe tirkeýlik jazbanyń 13 jasqa tolmaǵan paıdalanýshyǵa tıesili ekenin tekserý úshin profıl aqparatyn, jarııalanǵan beınelerdi jáne minez-qulyq sıgnaldaryn taldap otyr.

The Guardian-nyń habarlaýynsha, júıe problemaly dep belgilegen tirkeýlik jazbalaryn moderator mamandar tekseredi, biraq olar buǵattalmaıdy. Aıta ketý kerek, Ulybrıtanııadaǵy pılottyq joba myńdaǵan tirkeýlik jazbanyń joıylýyna ákeldi.

TikTok jańa tehnologııa EO normatıvtik talaptaryna sáıkes arnaıy jasalǵanyn habarlady. Júıeni ázirleý protsesi barysynda kompanııa EO-da qupııalylyqty jetekshi retteýshi organ – Irlandııanyń derekterdi qorǵaý komıssııasymen birlesip jumys istedi.

Eýropa Parlamenti áleýmettik jelilerdi paıdalaný úshin jas shekteýlerin engizýdi talap etip otyr, al Danııa 15 jasqa tolmaǵandarǵa áleýmettik jelilerdi paıdalanýǵa tyıym salǵysy keledi.

Eske sala ketsek, Eýroparlament qarasha aıynyń sońynda 16 jasqa deıingi balalarǵa áleýmettik jelilerdi paıdalanýǵa tyıym salý jóninde rezolıýtsııany bekitti.

Buǵan deıin Meta jańa adamnyń jasyn tekserý júıesin engizip jatqanyn jazǵan edik.

Bul áleýmettik jeliniń jáne onyń paıdalanýshylarynyń búkil álem boıynsha balalardy qorǵaý erejelerin saqtaýyn jeńildetedi.