TikTok balaǵat sózder bar kontent sany boıynsha kósh bastap tur
ASTANA. KAZINFORM – Qazaqstanda sońǵy eki jylda onlaın-platformalardan balaǵat sózder bar 161 materıal anyqtaldy. Óshirilgen kontent sany boıynsha TikTok kósh bastap tur. Bul týraly Kazinform saýalyna jaýap bergen Aqparat komıtetiniń tóraǵasy Álisher Muqajan aıtty.
Spıkerdiń aıtýynsha, 2025 jylǵy 1 qańtardan 2026 jylǵy 10 tamyzǵa deıin júrgizilgen monıtorıng barysynda balaǵat sózder kezdesetin 161 materıal anyqtalǵan. Onyń 66-sy byltyr, 95-i bıyl tirkeldi.
– 2026 jylǵy 10 tamyzdaǵy jaǵdaı boıynsha 2025–2026 jyldary anyqtalǵan materıaldardyń ishinen 62 quqyqqa qaıshy materıal joıyldy. Onyń 47-si TikTok platformasyna tıesili, - dedi Álisher Muqajan.
Qalǵan platformalardaǵy kórsetkish aıtarlyqtaı tómen. Instagram-nan 5, Telegram men YouTube-tan 3 materıaldan óshirilgen. Facebook-ta – 2, Threads pen OK platformasynda bir-bir materıaldan joıylǵan.
– Mınıstrlik mass-medıa ónimderi men onlaın-platformalarǵa turaqty túrde monıtorıng júrgizip, zań talaptarynyń saqtalýyn baqylaıdy. Zań buzýshylyq anyqtalǵan jaǵdaıda zańsyz materıaldardy ınternet-resýrstar men onlaın-platformalardan alyp tastaý boıynsha sharalar qabyldanady, - dedi ol.
