TikTok arqyly qumar oıyn uıymdastyrǵan eki turǵynǵa qatysty tergeý aıaqtaldy

Qarjylyq monıtorıng agenttigi Almaty qalasy boıynsha departamenti TikTok áleýmettik jelisi arqyly onlaın-qumar oıyndardy uıymdastyrǵan eki turǵynǵa qatysty sotqa deıingi tergep-tekserý isin aıaqtady.

Tergeý barysynda kúdiktilerdiń turaqty túrde tikeleı efır ótkizip, qumar oıyn uıymdastyrǵany anyqtaldy.

- Azamattar oıynǵa qatysý úshin aqsha qarajatyn banktik qosymshalar arqyly uıymdastyrýshylardyń shottaryna aýdaryp otyrǵan. Jınalǵan zańsyz tabys kólemi 10,5 mıllıon teńgeni qurady.

Sot úkimimen ekeýi de zańsyz oıyn bıznesin uıymdastyrǵany úshin kináli dep tanyldy. 

Birine 1 jyl 6 aı merzimge bas bostandyǵynan aıyrý jazasy taǵaıyndalsa, ekinshisi 2 jyl 6 aıǵa bostandyǵyn shekteý túrindegi jazaǵa tartyldy, - dep jazdy vedomstvodan.

Aıta ketý kerek, TikTok-taǵy oıyndardyń negizgi aýdıtorııasyn jastar quraǵan.

Bul – ınternet keńistiginde belsendi jastardyń qumar oıyndaryna tartylý qaýpin arttyryp, zııandy ádetterge, táýeldilikke jáne qarjylyq qıyndyqtarǵa ákelýi múmkin qaýipti áleýmettik úrdis.

Aıta keteıik, Túrkistan oblysynda alaıaqtyq jasaǵan turǵyn qarjyny qumar oıynǵa jumsaǵan.