TikTok AQSh-taǵy jumysyn jalǵastyrý úshin ınvestorlarmen kelisimge qol qoıdy
ASTANA. KAZINFORM — TikTok kompanııasy Oracle, Silver Lake jáne MGX sekildi úsh iri ınvestormen TikTok US atty jańa birlesken kásiporyn qurý týraly kelisimderge qol qoıdy, dep habarlaıdy Euronews.
Bul kelisim qysqa vıdeolardy kórýge arnalǵan tanymal qosymsha úshin mańyzdy kezeń sanalady. Qazirgi tańda TikTok-ty AQSh-ta 170 mıllıonnan astam adam turaqty paıdalanady. Kópjyldyq daýlar 2020 jylǵy tamyzda AQSh-tyń sol kezdegi prezıdenti Donald Tramp qosymshany qytaılyq shyǵý tegine baılanysty tyıym salýǵa alǵash ret, biraq sátsiz áreket jasaǵan kezden bastalǵan bolatyn.
Іshki qyzmettik jazbada kelisim 22 qańtarda tolyq aıaqtalýy tıis ekeni aıtylǵan. Bul qujat The Associated Press agenttiginiń qolyna túsken. Atalǵan habarlamada kompanııanyń bas atqarýshy dırektory Shoý Zı Chý ByteDance pen TikTok konsortsıýmmen mindettemelik kelisimderge qol qoıǵanyn qyzmetkerlerge rastaǵan.
— Osy múmkindikti paıdalana otyryp, adal eńbekterińiz ben tynymsyz jumystaryńyz úshin alǵys aıtqym keledi. Sizderdiń kúsh-jigerlerińizdiń arqasynda biz eń joǵary deńgeıde jumys istep kelemiz, al TikTok AQSh-ta da, álem boıynsha da ósip, damýyn jalǵastyryp jatyr. Bul kelisimder aıasynda biz burynǵydaı paıdalanýshylarymyz, kontent jasaýshylar, bıznes pen TikTok-tyń jahandyq qaýymdastyǵy úshin maqsattarǵa qol jetkizýge nazar aýdarýymyz kerek, - dep jazdy Chý qyzmettik jazbasynda.
Jańa TikTok US birlesken kásipornynyń aktsııalarynyń jartysy ınvestorlar tobyna tıesili bolady. Olardyń qatarynda Oracle, Silver Lake jáne Ámirlikterdiń MGX ınvestıtsııalyq kompanııasy bar. Bul ınvestorlardyń árqaısysy 15 paıyzdan úles alady. Jańa qosymshanyń 19,9 paıyzy ByteDance kompanııasynyń ózine tıesili bolsa, taǵy 30,1 paıyzy ByteDance-tiń qazirgi ınvestorlarymen affılıırlengen tulǵalardyń úlesinde bolady.
Qyzmettik jazbada ózge ınvestorlardyń kim ekeni naqtylanbaǵan. Al TikTok kompanııasy men Aq úı bul máselege qatysty túsinikteme berýden bas tartty.
Memorandýmǵa sáıkes, amerıkalyq kásiporynda jeti adamnan turatyn jańa dırektorlar keńesi qurylady. Keńestegi oryndardyń basym bóligin AQSh azamattary ıelenedi. Sonymen qatar kompanııa jumysyna amerıkalyqtardyń derekterin jáne AQSh-tyń ulttyq qaýipsizdigin qorǵaýǵa baǵyttalǵan talaptar qoldanylady.
Amerıkalyq paıdalanýshylardyń derekteri Oracle basqaratyn jergilikti júıede saqtalady.
Sonymen birge AQSh-taǵy qoldanýshylar «qazirgi tájirıbesin sol kúıinde» paıdalana beredi, al jarnama berýshiler jahandyq aýdıtorııaǵa qyzmet kórsetýdi jalǵastyrady.
Sondaı-aq TikTok algorıtmi amerıkalyq paıdalanýshylardyń derekteri negizinde qaıta úıretilip, kontentke syrtqy yqpaldyń bolmaýy qamtamasyz etiledi.
Budan bólek, amerıkalyq kásiporyn el aýmaǵyndaǵy kontent moderatsııasy men saıasattyń saqtalýyn baqylaýmen aınalysady.
Aıta keteıik, buǵan deıin AQSh pen Qytaıdyń resmı ókilderi TikTok qosymshasyn AQSh baqylaýyna berý jóninde aldyn ala kelisimge qol jetkizilgenin málimdegen bolatyn.