TikTok AQSh-ta buǵattalmaıtyn boldy: basqarý halyqaralyq ınvestorlarǵa ótti

ASTANA. KAZINFORM — Qytaılyq ByteDance kompanııasyna tıesili TikTok platformasy AQSh-taǵy ári ózge de halyqaralyq ınvestorlarmen kelisimge qol qoıdy. Kelisim boıynsha AQSh-taǵy bıznestiń basym bóligi jańa ıelerge ótedi, dep habarlady TikTok bas dırektory Shoý Tszy Chý qyzmetkerlerge joldaǵan hatynda («BBC» dereginshe). Bul týraly 24 kg jazdy.

Kelisimniń qurylymyna sáıkes:

• 50% kásiporyn ınvestorlar tobyna ótedi, oǵan Oracle, Silver Lake jáne MGX (BAÁ) ınvestıtsııalyq kompanııasy kiredi;

• 30,1% aktsııany ByteDance-tiń qazirgi ınvestorlarymen baılanysy bar qurylymdar alady;

• 19,9% bıznesti qytaılyq ByteDance ózinde qaldyrady.

Sonymen qatar, Oracle fırmasyna TikTok-tyń usynys algorıtmin paıdalaný lıtsenzııasy beriledi. Bul sheshim Vashıngtonnyń ulttyq qaýipsizdik salasyndaǵy alańdaýshylyǵyn azaıtýǵa baǵyttalǵan.

Kelisimdi aıaqtaý 2026 jyldyń 22 qańtaryna josparlanǵan. Bul AQSh bıliginiń 170 mıllıonnan astam amerıkalyq qoldanatyn platformany satý nemese bloktaý talpynystaryna núkte qoıady.

2024 jyly sáýirde Kongress platformany jańa ıesiz qaldyrmaý jaǵdaıynda tyıym salatyn zań qabyldaǵan. Donald Tramp prezıdenttik qyzmetke kirisken soń birneshe ret zańdy oryndaýdy keıinge qaldyrǵan.

2024 jylǵy qyrkúıekte Tramp Qytaıdyń tóraǵasy Sı Tszınpınmen telefon arqyly sóılesip, usynylǵan menshik berý shemasyna kelisim alǵanyn habarlaǵan.

TikTok ókilderi kelisim platformanyń turaqtylyǵyn qamtamasyz etip, ǵalamdyq qoǵamdastyqqa qyzmetin ári qaraı paıdalaný múmkindigin beredi dep sendiredi.

Buǵan deıin Tramp TikTok-qa oralyp, platformany «saqtap qalǵanyn» málimdedi.