TikTok AQSh aýmaǵynda qyzmetin toqtatty

ACTANA. KAZINFORM - TikTok AQSh-taǵy qyzmetin toqtatty, dep habarlaıdy Sınhýa agenttigi.

Belgili bolǵandaı, 19 qańtar kúni TikTok AQSh-tyq qoldanýshylarǵa: «Keshirińiz, TikTok-ty qazir paıdalaný múmkin emes. Amerıka Qurama Shtattary TikTok-ty paıdalanýǵa tyıym salatyn zań qabyldady. Ókinishke qaraı, bul qazirshe TikTok-ty qoldana almaıtynyńyzdy bildiredi. Biraq jaqsy jańalyq ta bar: Prezıdent qyzmetine kirisýge daıyn otyrǵan Donald Tramp TikTok-ty qaıta qoldanysqa engizýdiń jolyn tabý úshin bizben birge jumys isteıtinin málimdedi. Jańalyqtardy baqylap otyryńyz!» degen habarlama jibergen.

Qytaılyq BAQ-tardyń jazýynsha, TikTok -tyń ıesi — ByteDance kompanııasyna tıesili CapCut, Lemon8, Gauth jáne Hypic qosymshalarynyń da AQSh-tyq qoldanýshylarǵa qyzmet kórsetýdi ýaqytsha toqtatqany týraly habarlama jiberilgen.

17 qańtar kúni AQSh-tyń Joǵarǵy soty «TikTok-qa tyıym salý» týraly zańdy qoldaýǵa sheshim shyǵardy. Bul atalǵan zańnyń 19-shy qańtarda kúshke enýine ruqsat berilgenin bildiredi. Joǵarǵy sot sheshim qabyldaǵannan keıin Baıden úkimeti málimdeme jasap, «TikTok AQSh-tyqtar úshin qoljetimdi bolýǵa tıis», biraq onyń menshik quqyǵy AQSh-qa nemese AQSh-tyń kóńili tolatyn basqa bir tarapqa tıesili bolýy kerek dep atap kórsetti.

- Ýaqyttyń tyǵyzdyǵyna baılanysty, zańdy iske asyrý mindeti kelesi úkimettiń moınyna júkteledi, - delingen tıisti habarlamada.

Donald Tramp 18 qańtar kúni jýrnalıstermen júzdeskende prezıdenttik qyzmetke kiriskennen keıin TikTok-qa qatysty tyıymnyń oryndalýyn 90 kúnge keıinge shegerýi múmkin ekenin aıtty.

2024 jylǵy sáýirde AQSh Prezıdenti Djo Baıden Kongrestiń eki palatasy birdeı maquldaǵan zań jobasyna qol qoıdy. Osy zańǵa sáıkes, ByteDance kompanııasy 270 kún ishinde TikTok-ty qytaılyq emes kompanııaǵa satýǵa mindetti. Olaı bolmaǵanda, TikTok qosymshasy 2025 jyldyń 19 qańtarynan keıin AQSh-ta shekteledi.

Qyrǵyzstanda TikTok jelisiniń jumysyna tyıym salynatynyn jazǵan bolatynbyz.