«Tikeleı jelide - Qazaqstan Respýblıkasynyń Prezıdenti» Call-ortalyǵyna 23 myńnan astam suraq kelip tústi

 Bul málimetterdi atalǵan ortalyqtyń jetekshisi Álııa Ǵalymova aıtty, dep habarlaıdy QazAqparat.

Onyń aıtýynsha,  Qazaqstan Respýblıkasynyń Prezıdentimen ótetin bıylǵy tikeleı jeliniń basty ereksheligi -  shara barysynda alǵash ret barlyq qazirgi zamanǵy baılanys arnalarynyń múmkindikteri - Internettiń, telefonnyń, SMS-baılanysynyń paıdalanylýynda bolyp otyr.

Osy joly Elbasymen tikeleı jeli arqyly baılanysqa túsken Qazaqstan halqynyń belsendiligi  buǵan deıin ótkenderden anaǵurlym joǵary. Máselen, elordamyz Astanadan 3407,  al Almaty qalasynan 2247 saýal joldanǵan.

Sondaı-aq Ońtústik Qazaqstan, Almaty, Qaraǵandy, Shyǵys Qazaqstan oblystarynyń turǵyndary da Memleket basshysyna saýal joldaýda  barynsha belsendilik tanytýda. Atalǵan óńirlerdiń turǵyndarynyń saýaldaryna qaraǵanda, olardy negizinen halyqty áleýmettik qorǵaý, turǵyn úı qurylysy jáne turǵyn úı-kommýnaldyq sharýashylyǵy, zańdylyq pen quqyq tártibi, bilim jáne ǵylym, densaýlyq saqtaý máseleleri tolǵandyrady. Degenmen, memlekettik baǵdarlama boıynsha turǵyn úı alý jáne úleskerler problemasyna qatysty saýaldar kóp joldanyp, ózekti kúıinde qalyp otyr.

Sonymen qatar tikeleı jelige Reseı Federatsııasy, Germanııa, Ulybrıtanııa, Ózbekstan, Qytaı, Mońǵolııa, Baltyq elderi turǵyndary da óz suraqtaryn jiberýde.

Call-ortalyqtyń jetekshisi Álııa Ǵalymovanyń aıtýynsha, qarashanyń 13-inde Memleket basshysy «Habar», «Qazaqstan», «Astana» telearnalarynda, «Qazaq radıosynda» tikeleı efırde taratylatyn «tikeleı jeli» kezinde barynsha qyzyqty jáne reıtıngi joǵary suraqtarǵa jaýap beredi. Qalǵan suraqtarǵa jaýaptardy tıisti memlekettik organdar daıyndap, «Tikeleı jelide - Qazaqstan Respýblıkasynyń Prezıdenti» saıtyna ornalastyratyn bolady.

Qazaqstan Respýblıkasynyń Prezıdentimen ótetin tikeleı jelige qatysýshylar ózderine unaǵan suraqtaryna daýys bere alady. Qazirgi ýaqytta reıtıngi joǵary suraqtardyń ishinde - Astana qalasynyń jas jetkinshekterin bala baqshalarmen qamtamasyz etý, Shyǵys Qazaqstan oblysyndaǵy ekologııalyq ahýal, úleskerlik qurylys týraly máseler kósh bastap tur.

«Saıtqa qazaqstandyqtardan túsken barlyq suraqtar ornalastyrylady. Paıdalaný kelisimine sáıkes, elimizdiń zańdaryna qaıshy keletin, azamattardyń ar-ojdany men qadyr-qasıetine nuqsan keltiretin, qyzmettik jáne kommertsııalyq qupııany quraıtyn málimetter kirmeıdi. Saıt ákimshisi mundaı suraqtardy alyp tastaýǵa quqyly» deıdi Á.Ǵalymova.

Aıta keteıik,  2009 jyly  qarashanyń 13-i kúni Qazaqstan Respýblıkasynyń Prezıdenti N.Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana radıosy» boıynsha ótetin tikeleı efırde azamattardyń teleefır, telefon, ınternet jáne SMS habarlamalary arqyly túsken suraqtaryna jaýap beretin bolady. Suraqtardy respýblıka boıynsha +7 (7172) 555-777 telefony men  KCell, Beeline, Neo, Altel uıaly baılanysyn paıdalanýshylar úshin SMS habarlamalary arqyly 1111 nómirine jiberýge bolady. Sondaı-aq  
www.line.gov.kz saıtynyń tıisti tarmaǵyn paıdalana otyryp, beınesuraqty joldaýǵa bolady. Al jazbasha saýaldy vopros@akorda.kz elektrondyq mekenjaıyna jiberýge múmkindik bar.

«Qazaqtelekom» usynǵan baılanys tegin bolsa, uıaly telefondarǵa arnaıy tólemder qarastyrylǵan. «Tikeleı jeli» kezinde Elbasynyń nazaryna ilikpeı qalǵan saýaldarǵa tıisti memlekettik organdar bir aıdyń kóleminde jaýap ázirlep, saıtqa ornalastyratyn bolady. Al Interneti joq aýyldy jerler úshin ákimdikter janynan qoǵamdyq qabyldaý bólimderi ashylǵan.