Tıisti organdar Májiliste qańtar oqıǵasyna qatysty saýaldarǵa jaýap berýi qajet - Edil Jańbyrshın

ASTANA. QazAqparat – Búgin Májilistiń jalpy otyrysynda «Jańa Qazaqstan» depýtattyq tobynyń músheleri qańtar oqıǵasynyń birizdi mán-jaıyn ashyq aıtyp, onyń ádil baǵasyn berý kerek ekenin eskertti, dep habarlaıdy QazAqparat tilshisi.

«Búkil eldi dúr silkindirgen «Qasiretti qańtar» oqıǵasyna 1 jyl boldy. Sol kúnderi halqymyz buryn-sońdy bolmaǵan qaýip-qatermen betpe-bet keldi. Memleketimizdiń tutastyǵy men myzǵymas egemendigine zor qaýip tóndi. Qańtar kúnderi Táýelsizdiktiń qadir-qasıetin, tynyshtyq pen beıbitshilik qanshalyqty mańyzdy ekenin jan-júregimizben sezindik. Qańtardyń basy Mańǵystaýda óris alǵany belgili. Oqıǵa suıytylǵan gaz baǵasyn tómendetý kerek degen uranmen bastaldy. Basynda beıbit túrde bastalǵan sherýdi arandatýshy toptar paıdalanyp, onyń sońy iri qalalarda tártipsizdik pen qaıǵyly oqıǵalarǵa ulasty. Tóńkeris jasaýǵa umtylǵandardyń basynda belgili saıası laýazymdaǵy adamdardyń bolǵany anyq. Olar satqyndyq jasap, Memleket basshysyna eldegi ahýal týraly jalǵan aqparattar berdi. Іshten shyqqan jaýlar, muqııat oılastyrylǵan aýqymdy operatsııada, kásibı daıyndyqtan ótken baskeser-sodyrlardy esh tartynbastan paıdalandy. Іri shaharymyz aıaýly Almaty men keıbir qalalarymyzda urystar boldy. Eń sumdyǵy - ishki jáne syrtqy jaýlarymyz birige qylmystyq qımyl jasap, bılikke qarsy qoldarynan kelgenin istedi», - dedi depýtat Edil Jańbyrshın Bas prokýror Berik Asylovtyń atyna joldaǵan saýaldy jarııalaý kezinde.

Osy oraıda ol bul qylmystar eldik pen memleketimizge tóngen asa qaýipti syn-qater bolǵanyn aıtty.

«Jyl basynda halyq talabyn eskere kele, qańtar qasiretin ashyq talqylaý úshin «Jańa Qazaqstan» depýtattyq toby Bas prokýrorǵa depýtattyq saýal joldaǵan bolatyn. Ol saýalǵa Parlamentte arnaıy jaýap berildi. Shyndyǵyn aıtqanda, Májilis tórinde memlekettik tóńkeriske ıtermelegen oqıǵany mundaı keń aýqymdy talqylaý eshqashan bolmaǵan. Quqyq qorǵaý organdary tergeý qorytyndylary týraly esep berip, bári ashyq aıtyldy. Sol kezde birinshi ret qaıtys bolǵan 238 adamnyń tizimi men 3 myńnan astam qarýdyń urlanǵany habardar etildi. Qoǵamdy mazalaǵan suraqtardy búkpesiz qoıdyq. Birine jaýap alsaq, endi keıbirine tergeý amaldarynan soń naqty jaýap aıtylady delindi. Iá, búginde halyqtyń kókeıinde áli de jaýaby joq suraqtar jetkilikti. Sonymen, «Muny uıymdastyrǵan kimder, óıtkeni barlyq óńirlerde bir mezgilde tolqýlar bastaldy jáne qaskóılerdiń negizgi maqsaty ne boldy?», «Qańtar oqıǵasy qandaı zaqymdar men shyǵyndar keltirdi?», «Laýazymdyq mindetterin atqarý kezinde qaıtys bolǵan jáne zardap shekken qyzmetkerlerdi áleýmettik jaǵynan qorǵaý, kezdeısoq qaza bolǵan azamattarymyzdyń jaqyndaryna kómek kórsetý boıynsha qandaı jumystar júrgizildi?» degen saýaldar el ishinde aıtylyp júr», - dedi depýtat.

«Búgingi kúni bolǵan oqıǵa boıynsha tolyq túsinik qajet. Eldi ydyratý úshin jasalǵan opasyzdardyń júıeli qımyly, qyraǵy daıyndyǵy týraly tek qana boljamdar bar. Ashyǵyn aıtsaq, qazir qoǵamda túrli qaýeset taraýda. Bul ahýal jalǵan túsinik qalyptastyryp, feık aqparattardyń taraýyna zor yqpalyn tıgizip otyr. Sondyqtan quqyq qorǵaý organdarynyń tergeý amaldarynyń qorytyndysyna súıengen, oqıǵanyń birizdi mán-jaıy ashyq aıtylyp, onyń ádil baǵasy berilýi kerek dep sanaımyz. Kóterilgen máseleniń mańyzdylyǵyn eskere kele, tıisti kúshtik qurylymdar men memlekettik organdar, jyldyń basynda Májilistiń alǵashqy jalpy otyrysyna kelip, joǵaryda aıtylǵan jáne basqa da saýaldarǵa búkpesiz ashyq jaýap berýi qajet. Bul - halyqtyń talaby», - dedi E. Jańbyrshın.