Tıimsiz jumystyń úles salmaǵy joǵary bolyp otyr - D. Arǵandyqov

ASTANA. QazAqparat - Qazaqstanda 2,4 mln. adam ózin-ózi jumyspen qamtyǵandar sanatyna jatady. Bul týraly búgin Ortalyq kommýnıkatsııalar qyzmetindegi brıfıngte QR Densaýlyq saqtaý jáne áleýmettik damý vıtse-mınıstri Dáýlet Arǵandyqov málim etti.

Halyqty jumyspen qamtý salasynda Qazaqstanda naqty jetistikter bar ekenine toqtalǵan ol, jumyssyzdyq deńgeıi 2008 jyly 6,6 paıyz bolsa, 2014 jyldyń qorytyndysynda 5 paıyzǵa deıin tómendegenin, osy kezeń ishinde ekonomıkalyq belsendi turǵyndar sany 500 myń adamǵa artyp, 9 mln. adamǵa jetkendigin atap ótti.

Onyń sózine qaraǵanda, búginde jumyspen qamtylǵan turǵyndar sany 7,8 mıllıonnan 8,5 mıllıon adamǵa jetti.

Sonymen qatar vıtse-mınıstr Eýropalyq odaq elderinde 2014 jyly jumyssyzdyq 11,3 paıyzdy quraǵanyn, bul turǵyda eń joǵary kórsetkish Grekııada tirkelip, eńbekke qabiletti jastaǵy árbir tórtinshi azamat jumys taba almaı otyrǵanyn jetkizdi.

«Bizdiń ulttyq eńbek naryǵymyzda da belgili bir problemalar men qıyndyqtar bar. Oń kórsetkishterge qaramastan, tıimsiz jumystyń úles salmaǵy joǵary bolyp qalýda»,-dedi Arǵandyqov.

Halyqaralyq eńbek uıymynyń usynystaryna negizdelgen eńbek naryǵyndaǵy kórsetkishterdi statıstıkalyq baǵalaý ádistemesine sáıkes, Qazaqstanda 2,4 mln. adam ózin-ózi jumyspen qamtyǵandar sanatyna jatady. Statıstıkalyq málimetter boıynsha, ózin-ózi jumyspen qamtyǵan turǵyndar arasynda memlekettik qoldaýǵa muqtaj 700 myńdaı adam bar.