Tıimsiz paıdalanylyp jatqan jerlerdi memleketke qaıtarý úderisin ońaılatý kerek - S. Ahmetov
ASTANA. 14 tamyz. QazAqparat - Tıimsiz paıdalanylyp jatqan jerlerdi memleketke qaıtarý úderisin ońaılatý kerek. Bul týraly búgin Úkimette ótken selektorlyq keńeste QR birinshi vıtse-premeri Serik Ahmetov málim etti.
«Elbasy jaqynda soltústik óńir basshylarymen ótken keńeste jerdi túgendeýge qatysty máselelerge taǵy da basa nazar aýdardy. Árıne, bul baǵytta kestege saı jumys júrýde. Jeke turǵyn úı qurylysyn salýǵa berilgen jerlerdi túgendeý aıaqtaldy. Aýyl sharýashylyǵy maqsatyndaǵy jerlerdiń birazy bıyl júzege asady jáne onyń barysy týraly aralyq aqparat Memleket basshysyna usynylatyn bolady», - dedi birinshi vıtse-premer.
Sonymen qatar, jerdi túgendeý barysynda týyndaǵan problemalarǵa toqtalǵan Serik Ahmetov, eń aldymen tıimsiz paıdalanylyp jatqan jerlerdi qaıtarý barysynda bıýrokrattyq kedergiler tap bolatynyn atap ótti.
«Jerdi alyp qoıý úshin aldymen ol týraly eskertý jasaýymyz kerek, al eskertý jasaǵannan keıin ony tirkeýimiz kerek, ol tirkelgennen soń ony bir jyl tosýymyz kerek. Al budan soń sotqa shaǵymdaný quqyǵyn ıelenýge de birshama úderister ketip, sonyń ózi jyldarǵa sozylady», - dedi ol.
Bul rette jerdi túgendeý sharasy ony tıimdi paıdalanýǵa birshama septigin tıgizgenin aıtqan S. Ahmetov, «tıimdi paıdalanylmaı otyrǵan jalǵa alýshylardan jerdi alyp qoıý úderisin ońaılatý qajettigin» aıtty. «Aldaǵy ýaqytta jeke turǵyn úı qurylysyn salýǵa qatysty jer berýde de qatań talaptar qoıylýy shart. Elbasy Býrabaıdaǵy kezdesýde bul jaıynda da aıtty. Jergilikti atqarýshy organdar 10 sotyq jerdi tegin úlestirip bergenimen, olar keıbir jaǵdaıda naryqqa qaıta saýdaǵa túsip jatyr. Sondyqtan, buǵan erekshe kóńil bólý kerek. Sonymen qatar, «Qoljetimdi baspana» baǵdarlamasy da jeke turǵyn úı qurylysyn salýǵa arnalǵan jerlerdi tıimdi paıdalanýǵa septigin tıgizedi dep oılaımyn», - dedi S. Ahmetov.
