Tıimsiz paıdalanylatyn jerlerdi qaıtaryp alý kerek - Nursultan Nazarbaev

ASTANA. QazAqparat - Astananyń tóńiregindegi tıimsiz paıdalanylatyn jerlerdi memleket menshigine qaıtarý qajet. Bul týraly elordany odan əri damytý máseleleri jónindegi májiliste Elbasy Nursultan Nazarbaev aıtty, dep habarlaıdy QazAqparat.

«13 myń gektar jer tıimsiz paıdalanylýda. Al bul - aýmaqtyń 16 paıyzy. Shaǵyn jáne orta bıznes bolsa qurylys júrgizý úshin jer ala almaı otyr.  Munymen kim aınalysady?», - dep surady Elbasy.

Osy rette elorda ákimdiginiń ókili jerdiń paıdalanylý maqsatyn ózgertý úshin maqsatty qunyn tóleý qajettigin, al munan jergilikti bıýdjet qarjy joǵaltatyndyǵyn aıtty.

Bul jaýapqa qanaǵattanbaǵan Elbasy: «13 myń gektar jer 10 jyl boıy paıdalanylmaýda. Nege qaıtaryp ala almaımyz? Nusqaý bar ǵoı, 2 jyl paıdalanbasa memleketke qaıtarýy tıis», - dedi Memleket basshysy.

Astana qalasy ákimi Áset Isekeshevtiń sózine qaraǵanda, Qazaqstan Prezıdenti 2012 jyly 16 myń gektar jerdi memleketke qaıtarý týraly tapsyrma bergen.

«Bas prokýratýranyń jol kartasy bar. 6 myń gektar qaıtaryldy. 5 myń gektardy ıgerý jumystary júrgizilip jatyr. Qalǵandary boıynsha talap-shaǵym jumystary júrgizilý ústinde. Al aýyl sharýashylyǵy maqsatyndaǵy jerlerge qatysty aıtar bolsam, bul baǵytta Salyq kodeksine ózgertýler engizý qajet. Atalǵan jerlerdi basqa sanatqa aýdarýǵa bolady. Onda jer ıeleri 600 mlrd teńge tóleýleri kerek», - dedi qala basshysy.

Osyǵan oraı, Nursultan Nazarbaev bul máseleni túbegeıli sheshýdi qatań tapsyrdy.

«Onda jerdi aýyl sharýashylyǵy maqsatynda paıdalansyn. 3 jyl paıdalanbasa memleketke qaıtarsyn. Kezinde bul máseleni Bas prokýrormen sóıleskenmin. Qaırat Qojamjarovpen birge atalǵan máselemen aınalysyp, bul jaıynda maǵan baıandańyz», - dedi Memleket basshysy Astana ákimine qarata.