Tıimdilikti arttyrý baǵdarlamasy QTJ-ǵa qosymsha 576 mlrd. teńge paıda beredi

ASTANA. QazAqparat - Tıimdilikti arttyrý baǵdarlamasy QTJ-ǵa qosymsha 576 mlrd. teńge paıda ákelmek. Bul týraly búgin Ortalyq kommýnıkatsııalar qyzmetinde ótken brıfıngte «Qazaqstan temirjoly» UK» AQ-nyń korporatıvti damý boıynsha atqarýshy dırektory Erkin Jýsanbaev málim etti.

«2010 jyldan beri qolǵa alynyp kele jatqan tıimdilikti arttyrý baǵdarlamasy 2020 jylǵa deıin QTJ-ǵa qosymsha 576 mlrd. teńge paıda beredi», - dedi ol. Onyń sózine qaraǵanda, kompanııa kiristerdi ártaraptandyrýdy qolǵa alady. Tranzıttik júk tasymaldaryn, kóliktik-logıstıkalyq saladan túsetin paıda kózderin ártaraptandyrý arqyly kompanııa daǵdarystyń keri saldarlaryn bildirtpeýdi kózdep otyr. Máselen, tranzıttik júkterdiń tasymaly kompanııanyń tórtten bir bóligin quraıdy. «Bul asa áleýetti naryq, sondyqtan biz óz qyzmetterimizdiń sapasy men básekege qabilettiligin arttyrý boıynsha jumystardy qarqyndy qolǵa alatyn bolamyz», - dep túıdi sózin E.Jýsanbaev.