Tyǵyryqqa tirelgen Gazada tártipsizdik beleń ala bastady - DDSU

ASTANA. KAZINFORM – Dúnıejúzilik densaýlyq saqtaý uıymynyń bas dırektory Tedros Adanom Gebreıesýs beısenbi kúni tyǵyryqqa tirelgen Gazada tártipsizdik beleń ala bastaǵanyn aıtty. Sondaı-aq ol shuǵyl medıtsınalyq kómekti qajet etetin adamdardy anklavtan evakýatsııalaý úshin gýmanıtarlyq dáliz jasaýǵa shaqyrdy, dep jazady Sınhýa.

- Adamdar ashtyqtan ǵana emes, azyq izdep jankeshti áreketterdiń saldarynan, aýrýdan ólip jatyr, - dedi DDSU bas dırektory Jenevada ótken brıfıng barysynda.

 Bul rette ol 27 mamyr kúni azyq-túlik taratatyn oryndardan tamaq alý kezinde 1600 adamnyń qurban bolǵanyn, 12 myń adamnyń jaraqat alǵanyn atap ótti.

Onyń sózinshe, Gaza turǵyndarynyń basty degen qyzmetterge qol jetkizý múmkindigi shekteýli, olar azyq-túlik jetkizilimine qoıylǵan tosqaýyl saldarynan zardap shegip jatyr.

- Toıyp tamaq ishe almaý onda ádettegi jaǵdaı, al ashtyqtan ólip jatqandar sany kún sanap ósip keledi, - dedi ol.

Bul rette ol shilde aıynda 5 jasqa deıin 12 myń balanyń qatty ashyqqanyn jetkizdi. Bul tarıhtaǵy eń joǵarǵy kórsetkish bolyp otyr.

Adamdar sanynyń shekten tys tyǵyz shoǵyrlanýy, sýmen qamtý men sanıtarlyq jáne gıgıenalyq jaǵdaıdyń nasharlyǵynan aýrý juqtyrý órship barady.

DDSU bas dırektory qaqtyǵys bastalǵan 2023 jyldyń qazan aıynan beri uıym Gazadan 7522 adamnyń evakýatsııalanýyna kómek kórsetkenin jetkizdi. Alaıda anklavta áli 14,8 myń adam arnaıy mamandandyrylǵan medıtsınalyq kómekke zárý.

Osyǵan deıin Gaza sektorynda gýmanıtarlyq júk kóligi aýdarylyp, 20 adam mert bolǵany týraly jazdyq.