THKB: Grýzııanyń Potı portynda Qazaqstannyń termınaly ashylady

ASTANA. KAZINFORM – Bıyl sáýir aıynda Grýzııanyń Potı portynda Qazaqstannyń óz termınaly ashylady. Bul týraly Kólik mınıstri Marat Qarabaev aıtty.

- Qazaqstan men Grýzııa arasynda kólik salasyndaǵy qarym-qatynas qarqyndy damyp kele jatyr. Eki el arasynda eń kóp talqylanatyn másele – Transkaspıı halyqaralyq kólik baǵytyn damytý. Onyń sheńberinde byltyr temirjolmen júk tasymaldaýdyń kólemi 4,7 mln tonnaǵa jetip, jalpy 30 paıyzdyq ósim kórsetti. Osy baǵytta avtokólikpen júk tasymaldaýdyń kólemi 42 myń tonnaǵa jetip, 17 paıyzǵa artty. Qazir talqylap otyrǵan máselemiz Transkaspıı halyqaralyq kólik baǵyty sheńberinde Grýzııa ózderiniń Potı dep atalatyn portyn damytyp jatyr. Qazaqstan sonda óz termınalyn qoıatyn bolyp sheshim qabyldanǵan. Byltyr bizdiń elimizdiń ınvestory sol termınaldyń qurylysyn bastady. Bıyl sáýir aıynda osy termınaldy tolyq iske qosamyz dep josparlap otyrmyz, - dedi mınıstr Qazaqstan jáne Grýzııa Úkimet basshylarynyń kelissózinen keıin BAQ ókilderine. 

Kólik mınıstriniń aıtýynsha, bul joba elimizdiń kólik-tranzıttik áleýetin arttyrady. Ony salýǵa jeke ınvestor 60 mln AQSh dollaryndaı qarjy salyp otyr. 

Aıta keteıik, buǵan deıin 20 jyl ishinde el ekonomıkasyna grýzııalyq ınvestorlar qansha qarjy quıǵanyn jazǵan edik. 

Sondaı-aq Qazaqstan men Grýzııa arasynda Transkaspıı halyqaralyq kólik baǵyty arqyly júk tasymaldaý kólemi ótken jyly 62 paıyzǵa artty. 

Qazaqstan 2025 jyly Grýzııaǵa 80 myń tonna bıdaı eksporttaıdy.