Qazaqstannyń Ibrahım kelisimine qol jetkizýdegi pragmatıkalyq joly - The Washington Post
ASTANA. KAZINFORM - Búgin tańerteń The Washington Post basylymynda «Qazaqstannyń Ibrahım kelisimine qol jetkizýdegi pragmatıkalyq joly» atty aýqymdy maqala jarııalandy.
Munda basylym pikirinshe, Qazaqstannyń atalǵan kelisimge kelýine negiz bolatyn jáıtter jan-jaqty taldanǵan. Qazaqstannyń bul qadamy muqııat oılastyrylǵan, pragmatıkalyq, jan-jaqty eseppen jasalǵan áreket retinde baǵalanǵan. Sondaı-aq prezıdenttiń dıplomatııalyq sheberligi men strategııalyq oılaý qabileti birneshe ret erekshe atalǵan. Maqalada eń aldymen bul sheshimge Vashıngtondaǵy keı sarapshylar tańqalǵany aıtylady.
Sonymen qatar, Qazaqstannyń ne sebepti Ibrahım kelisimderine qosylǵanyna qatysty suraqtar týyndaǵany sóz bolǵan. Keıbireýler bul qadamdy Trampqa arnalǵan dabyl dep baǵalasa da, maqalada Qazaqstannyń pragmatıkalyq maqsatty kózdegeni kórinip tur. Al Qazaqstan qabyldaǵan sheshimder óte názik geosaıası jaǵdaıda turǵan memlekettiń utymdy áreketi retinde kórsetiledi.
Qazaqstannyń Ibrahım kelisimderine qatysýy men Aq úıde ótken kezdesýleri Máskeý men Beıjińge óz eliniń táýelsiz saıasat júrgizip otyrǵanyn bildiredi delingen.
Maqala «Ibrahım kelisimderine qosylý – Vashıngtonnyń oń nazaryn aýdarý úshin oılastyrylǵan, pragmatıkalyq qadam» dep qorytyndylanǵan.
Maqalada C5+1 kezdesýinen buryn prezıdent Qasym-Jomart Toqaevpen qysqa suhbatqa silteme jasalǵan. Sondaı-aq, eki sarapshynyń pikirleri keltirilgen. Olar Qazaqstannyń sheshimin teńdestirilgen, tıimdiligi joǵary, syrtqy saıasatta qarym-qatynasty ártaraptandyrýǵa arnalǵan dep kórsetedi.
Sonymen qatar, AQSh-tyń ustanymy da qarastyrylǵan: «Tramp Qytaıdyń ústemdigine qarsy turý úshin mańyzdy mıneraldardy jetkizýdiń jańa joldaryn qurýǵa basa nazar aýdarady» delingen.
The Washington Post úshin bul óte mańyzdy materıal, jáne C5+1 sapary AQSh-ta mańyzdy qadam retinde qabyldandy, sondaı-aq Qazaqstannyń AQSh-pen yntymaqtastyqty keńeıtýge naqty daıyn ekenin kórsetti.
Osyǵan deıin Qazaqstan delegatsııasynyń AQSh-qa sapary barysynda jasalǵan kelisimder týraly jazdyq.