The UAE SWAT Challenge 2025: «Tomiris» áıelder arnaıy jasaǵy júldemen oraldy
ASTANA. KAZINFORM — Dýbaıda ótken halyqaralyq «The UAE SWAT Challenge 2025» arnaıy jasaqtar jarysyna Qazaqstan atynan alǵash áıelder komandasy qatysty.
Halyqaralyq týrnır zamanaýı tásilder boıynsha tájirıbe almasýǵa, arnaıy jasaqtyń daıyndyq deńgeıi men halyqaralyq yntymaqtastyqty arttyrýǵa septigin tıgizip, jalpy jahandyq qaýipsizdikti nyǵaıtýǵa oń áser etedi.
— Alǵash ret arnaıy jasaqtar qatarynda arýlarymyz qatysty, olar álemniń myqty jigitterimen birge synǵa tústi. Naǵyz sheberlik pen qaısarlyqtyń belgisin kórsetti. Bul naǵyz erlik. Qurmetti jaýyngerler, biz sizdermen maqtanamyz, árqashan, ár saıysta tek qana jeńis bolsyn, alǵa Qazaqstan!, — dedi Іshki ister mınıstri Erjan Sadenov arnaıy jasaq quramasyn saltanatty túrde qarsy alý barysynda.
«Tomiris» arnaıy jasaǵy áıelder komandasy arasynda kúmis júldege ıe boldy.
— Áserdi sózben jetkizý múmkin emes, oǵan qatysý kerek. Bes kún erekshe ótti, ár kúnniń óz qıyndyǵy boldy. Qyzdar bári oıdaǵydaı, josparǵa saı oryndap shyqty. Negizi qyzben er adamdy salystyrýǵa bolmaıdy, soǵan qaramastan namysty erlermen qatar qorǵadyq. Eń myqty komanda, árıne, Qazaqstan! — dedi Іshki ister mınıstrliginiń «Tomiris» áıelder arnaıy jasaǵynyń múshesi Balnur Qııalbekova BAQ ókilderine suhbat bere turyp.
«The UAE SWAT Challenge 2025» arnaıy jasaqtar jarysyna Qazaqstannan alǵash Ulttyq ulan komandasy 2019 jyly qatysty.
— Biz jarysta erlermen qatar básekege tústik. Jarys óte joǵary deńgeıde ótti, barymyzdy saldyq. Jarysqa joǵary deńgeıde daıyndaldyq, oqý-jattyǵý elordada ótti. Sońǵy kezeńde uldardyń ózi óte almaı jatqanda, bizdiń komanda bir qarqynda ótip shyqtyq, — dep qýanyshty sátpen bólisti Іshki ister mınıstrliginiń «Tomiris» áıelder arnaıy jasaǵynyń taǵy bir múshesi Quralaı Qabyraıqyzy.
Buǵan deıin habarlaǵanymyzdaı, Qazaqstannyń arnaıy jasaǵy álemdik dodadan kúmis júldemen oraldy. Jarys jeńimpazdaryn elorda jurty áýejaıdan qoshemetpen qarsy aldy.