The Times: London Vashıngtonmen barlaý derekterin almasýdy ýaqytsha toqtatty

ASTANA. KAZINFORM — Brıtandyq barlaý qyzmetteri men áskerı qurylymdar AQSh-qa Karıb teńizindegi kemelerdiń qozǵalysyna qatysty barlaý málimetterin berýdi toqtatty. Bul týraly The Times gazeti habarlady. Buǵan deıin osyǵan uqsas aqparatty amerıkalyq CNN telearnasy da óz derekkózderine silteme jasap taratqan.

Gazettiń aty-jóni atalmaǵan derekkózi habarlaǵandaı, buǵan deıin brıtandyq tarap amerıkalyq áriptesterine esirtki tasymaldaýy múmkin qaıyqtardyń koordınattary men olardyń bortyndaǵy adamdardyń sany jóninde málimet berip kelgen.

Basylymnyń málimetinshe, Ulybrıtanııanyń Koroldik áskerı-teńiz kúshteri Karıb aımaǵynda esirtki kontrabandasyna qarsy operatsııalar júrgizip keledi, biraq olardyń tásili AQSh-pen salystyrǵanda ózgeshe.

«Biz kemelerdi basyp alyp, ondaǵy adamdardy óltirmeımiz. Biz olardy ustaımyz», dedi gazetke suhbat bergen brıtanııalyq flottaǵy derekkóz.

Ulybrıtanııa úkimeti barlaý derekterimen almasýdy toqtatý týraly aqparatqa túsinikteme bermedi. The Times-tyń jazýynsha, ázirge bul sheshimge AQSh tarapynan qandaı da bir sharalar qabyldanǵan-qabyldanbaǵany belgisiz. Vashıngton buǵan deıin Ulybrıtanııamen Ýkraına jáne ózge de birneshe aımaqqa qatysty barlaý aqparattarymen bólisip kelgen.

Basylym eske salǵandaı, ótken jyldyń qyrkúıeginde Ulybrıtanııa Koroldik Áskerı-teńiz kúshteriniń HMS Trent patrýldik kemesi alǵash ret Karıb teńizinde esirtki kontrabandısteriniń súńgýir qaıyǵyn toqtatyp, 160 mıllıon fýnt sterlıngke (210 mıllıon dollar) baǵalanǵan kokaındi tárkilegen. Operatsııa Domınıkan Respýblıkasynan 190 teńiz mıli qashyqtyqtaǵy ońtústikte AQSh jaǵalaý kúzeti men amerıkalyq patrýldik ushaqtyń qatysýymen ótken. Nátıjesinde on bir kúdikti ustalǵan.

Eske sala ketsek, AQSh áskeri Tynyq muhıtynda esirtki tasyǵan tórt kemege soqqy jasady. 

Jýyrda Ulybrıtanııada áskerı tikushaq óndiretin sońǵy zaýyt jabylýy múmkin ekenin jazdyq.