The Telegraph tańdaýynan keıin gollıvýdtyq túsirilimder men ıÝNESKO tiziminen ne kútemiz
ASTANA. KAZINFORM – Qazaqstannyń tabıǵı jaýhary – Mańǵystaý óńiri halyqaralyq deńgeıde taǵy bir márte moıyndaldy. Tanymal brıtandyq The Telegraph basylymy Mańǵystaýdy «Ómirińizde mindetti túrde barý kerek 10 shóldiń» tizimine qosty.
Basylym óńirdiń erekshe landshafty men mınımalıstik sulýlyǵyn álemniń eń áıgili shóldi jerlerimen qatar qoıyp otyr.
Bul jetistik pen aldaǵy iri jobalar týraly Mańǵystaý oblysy týrızm basqarmasynyń basshysy Ersin Ibrashev «Jibek Joly» telearnasynyń «Búgin.Live» baǵdarlamasynda keńinen baıandap berdi.
Brıtandyq basylymnyń nazaryna iligý – kezdeısoqtyq emes. Óńir basshylyǵy sońǵy jyldary halyqaralyq Vogue jýrnaly men Euronews arnasynyń ókilderin arnaıy shaqyryp, ólke sulýlyǵyn óz kózderimen kórýge jaǵdaı jasaǵan. Nátıjesinde Mańǵystaýdyń aıryqsha tabıǵaty sarapshylar tarapynan joǵary baǵalandy.
– Belgili basylymnyń top ondyǵyna ený – biz úshin úlken mártebe ári joǵary saraptamalyq baǵa. Biz bul baǵytta Kazakh Tourism uıymymen belsendi jumys istep jatyrmyz. Fotodan kórgen bir bólek qoı, sol sebepti sheteldik basylym ókilderin arnaıy shaqyryp, jerdiń qudiretin sezindirý bizdiń strategııalyq qadamymyz boldy. Bul tek ımıdj úshin emes, sheteldik týrıster men ınvestıtsııa tartý úshin de jasalyp jatqan jumys, – deıdi Ersin Ibrashev.
Mańǵystaý tek fotograftar men saıahatshylardy ǵana emes, álemdik kınoındýstrııany da qyzyqtyra bastady.
Basqarma basshysynyń aıtýynsha, bıyl óńirde álemge áıgili akter Djekı Channyń qatysýymen úlken kınojoba júzege aspaq.
– «Qudiretti saýyt: Ýltımatým» (Dospehı boga: Ýltımatým) fılminiń kezekti bólimin túsirýdi kózdep otyrmyz. Buǵan deıin munda reseılik mýzykanttar men «Ay Yola» toby beıneklıp túsirgen bolatyn. Sondaı-aq mıllıondaǵan oqyrmany bar qytaılyq bloger Taý Taýdy taǵy da shaqyryp, Úndistannan da tanymal tulǵalardy aldyrýdy josparlap otyrmyz, – dep atap ótti basqarma basshysy.
Kıno men týrızmnen bólek, óńirdiń rýhanı murasy da halyqaralyq deńgeıge kóterilmek. Mańǵystaýdaǵy 30-dan astam kórnekti oryndardyń ishinde bes jerasty meshiti bıyl ıÝNESKO-nyń mádenı muralar tizimine enýi múmkin.
– Bıyl Beket ata, Qaraman ata, Shaqpaq ata, Shopan ata jáne Sultan Ápe meshitteri ıÝNESKO quramyna kiredi dep kútip otyrmyz. Bul – rýhanı týrızmdi damytýǵa úlken serpin beredi. Oǵan qosa, Memleket basshysynyń tapsyrmasymen ınfraqurylymdy jaqsartý jáne abattandyrý boıynsha keshendi jospardy iske asyryp jatyrmyz. Bozjyra, Sherqala, Jyǵylǵan sııaqty biregeı oryndarǵa keletin jol men jaǵdaıdy jaqsartý – basty nazarda, – dep túıindedi E. Ibrashev.
Eske sala keteıik, Aqtaýda qys mezgilinde qolaısyz aýa raıynyń saldarynan zardap shekken eki aqqý qutqarylyp, tabıǵı mekenine qaıtarylǵanyn jazǵan edik.