«The Telegraph» gazetiniń «Jyl fotosýretteri» toptamasynda Qazaqstanda túsirilgen foto jarııalandy (FOTO)
ALMATY. QazAqparat - Brıtanııada kún saıyn shyǵatyn «The Telegraph» basylymynyń saıtynda «Jyl fotosýretteri» dep atalatyn toptamaǵa «Kazakhstan Fashion Week» (KFW) sán aptalyǵynda túsirilgen fotosýret endi.
Onda atalǵan sán aptalyǵynyń ótken jylǵy kúzgi kórsetilimderiniń birine qatysqan model túsirilgen. Fotosýrettiń avtory: Shámil Jumatov.
Saıttyń «Pictures of the year: October, November and December 2015» (Jyl fotosýretteri: 2015 jyl, qazan, qarasha, jeltoqsan aılary) taraýynda Qazaqstanmen qatar, álemniń túkpir-túkpirinde túsirilgen eń qyzyqty jáne erekshe fotosýretter kórsetilgen. Onda tabıǵı qubylystar, jer sharynyń ásem jerleri týraly jáne basqa da fotosýretterdi kórýge bolady. Olardyń ishinde ataqty tulǵalardyń ezý tarttyrar fotosýretteri de bar.
Aıta ketelik, The Telegraph - Ulybrıtanııada The Times, The Guardian jáne The Independent sekildi eń tanymal gazetterdiń biri. Ol 1855 jyldan beri shyǵyp keledi. Kún saıyn 600 myńnan astam danamen taraıdy. Basylymnyń onlaın nusqasy da bar.
