The Rompetrol Group bıylǵy jyly taza shyǵyndy 3,7 esege deıin tómendetedi
ALMATY. 2 naýryz. QazAqparat /Erbol Azanbek/ - «The Rompetrol Group» munaı kompanııasy bıylǵy jyly taza shyǵynyn 3,7 ese 48,3 mıllıon AQSh dollaryna deıin azaıtýdy josparlap otyr.
Bul týraly búgin Almatyda isker BAQ ókilderimen kezdesken kompanııa basshylary málim etti.
Esterińizge sala keteıik, The Rompetrol Group «QazMunaıGaz» AQ UMK enshiles kompanııasy sanalady. QMG rýmynııalyq munaı kompanııasynyń 2007 jyly 25 paıyz, 2009 jyly qalǵan 75 paıyz aktsııasyn satyp alǵan bolatyn. Qazirgi kezde munaı holdıngine qarasty Rýmynııada ornalasqan bir munaıhımııa jáne eki munaı óńdeý zaýyty, Grýzııa, Frantsııa, Moldova, Ýkraına, Ispanııa men Bolgarııada myńnan astam janarmeı beketteri, bir munaı saqtaý qoımasy, eki gaz quıý kompanııasy, eki munaı qyzmetin kórsetý kompanııasy, sondaı-aq jelim qubyrlar men armatýra shyǵarý zaýyty bar.
«The Rompetrol Group»-ti satyp alý «QazMunaıGazǵa» turaqty ári ósý ústindegi 300 mıllıon turǵyny bar naryqqa shyǵýǵa múmkindik berdi. Bul satyp alý 1,750 mıllıon AQSh dollaryn qurady. Buǵan halyqaralyq iri sarapshy, keńesshi kompanııalar tartyla otyryp, «ádil satyp alý» júzege asyryldy»,- dedi Rompetrol tobynyń bas dırektory Sadýaqas Meralıev.
Onyń aıtýynsha, satyp alý kezi álemdik daǵdaryspen, munaı baǵasynyń tómendeýimen tuspa-tus keldi. «2008- 2009 jyldary da munaı óńdeýden túsken marja tómengi deńgeıde qaldy. Buǵan sáıkes biz daǵdarysqa qarsy sharalardy júzege asyrýǵa májbúr boldyq. 2009 jyly bul baǵdarlama boıynsha shyǵyndar 180 mıllıon dollarǵa, 2010 jyly 30 mıllıon dollarǵa azaıtyldy. Bıylǵy jyly 90 mıllıon AQSh dollaryna deıin azaıtý josparda. Jospar boıynsha jalpy shyǵyndar 872 mıllıon AQSh dolarynan 600 mılıon AQSh dollaryna deıin tómendeıdi. 2010 jyldan bastap naryqta ońalý oryn aldy. Bıylǵy jyl basynan munaı men munaı ónimderiniń álemdik naryǵy jaqsy ekonomıkalyq ósim kórsete bastady, bul óz kezeginde munaı ónimderi marjasyn ulǵaıtýǵa septigin tıgizip otyr. Bul bizge de ózgeris engize bastady, qańtar aıynda Rompetrol taza nátıje kórsete bastady. 2012 jyldan bastap Rompetrol taza paıdaǵa qol jetkize bastaıdy»,- dedi S.Meralıev.
«Daǵdarysty artqa tastaýmen qatar kompanııa aldynda damý maqsaty tur. Ol boıynsha negizgi 3 mindet bar. Birinshi kezekte 2012 jyly kompanııaǵa qarasty munaı óńdeý zaýyttaryn qaıta qalpyna keltirip jáne jańa 5 munaı óńdeý qurylyǵysyn qosý, ekinshi kezekte Eýropa naryǵyndaǵy úlesti arttyrý, úshinshi maqsat - uzaq merizimdi, ol boıynsha qazaqstandyq energoresýrstardy Eýropa naryǵyna shyǵarýdyń negizgi bazasyna aınalý qajet»,-dedi S.Meralıev.
