The New York Times Pentagondy jýrnalıst quqyqtaryn buzdy dep sotqa berdi

ASTANA. KAZINFORM — Beısenbi kúni The New York Times gazeti AQSh Qorǵanys mınıstrligi men vedomstvo basshysy Pıt Hegsetke qarsy sotqa shaǵym túsirdi. Bul – Pentagonnyń jańa saıasatyna baılanysty, dep habarlaıdy NPR. 

Qyrkúıekte jarııalanǵan jańa saıasatqa sáıkes, akkredıtatsııalanǵan jýrnalısterge mınıstrlik basshylyǵy ashyq paıdalanýǵa arnaıy ruqsat bermegen, qupııa emes materıaldardy da taratýǵa tyıym salynady.

Mundaı aqparatty alýǵa tyrysqan jýrnalıster «qaýipsizdikke qater tóndirýshiler» retinde qarastyrylady.

Pentagonnyń dereginshe, jańa erejeler vedomstvodan aqparattyń syrtqa shyǵýyn boldyrmaýǵa baǵyttalǵan.

Alaıda The New York Times jáne birqatar basqa buqaralyq aqparat quraldary buǵan qarsy narazylyq retinde óz baspasóz ruqsattarynan bas tartty.

Mamyr aıynda Hegset jýrnalısterdiń resmı jetekshisiz Pentagonnyń kóptegen ǵımarattarynda erkin qozǵalý múmkindigin shekteıtin jańa erejelerdi jarııalady. Bul ózgeris demokrattar men respýblıkalyqtar basqarǵan ákimshilikter kezinde qalyptasqan kópjyldyq dástúrdi buzdy.

Keıin, qyrkúıekte BAQ uıymdaryna ruqsat etilmegen materıaldardy jarııalamaý – tipti olardy izdemeý týraly mindettemege qol qoıýdy talap etetin sheshim qabyldandy.

Osy aptada Pentagon jańa baspasóz korpýsyn resmı túrde qarsy aldy.

— Eski medıalar bul ǵımarattan óz erkimen ketýdi sheshti. Al sandarǵa qarasaq, nege eshkim olardyń sońynan ermegeni túsinikti bolady. Negizgi medıaǵa degen jalpyulttyq senim 28 paıyzǵa deıin tústi — bul tarıhtaǵy eń tómengi kórsetkish. Amerıkalyqtar bul úgitshilerge senbeıdi, óıtkeni olar shyndyqty aıtpaıtyn bolǵan, — dedi Pentagonnyń baspasóz hatshysy Kıngslı Ýılson.

Shaǵymda Pentagon baspasóz ruqsattaryn kenetten ózgertip, jýrnalısterge bul sheshimge shaǵymdanýǵa múmkindik bermegeni aıtylady. Bul áreket olardyń Konstıtýtsııamen qorǵalatyn ádil qaralý quqyǵyn buzady dep kórsetilgen.

— Pentagonnyń baspasózge qoljetkizý saıasaty zańsyz, óıtkeni ol memlekettik sheneýnikterge akkredıtatsııany kimge berý, kimge bermeý týraly sheksiz ókilettik beredi. Bul — Birinshi túzetý boıynsha tyıym salynǵan. Qoǵamǵa Pentagondaǵy protsesterdi baqylaıtyn táýelsiz jýrnalıstıka jáne ony tanystyratyn jýrnalıster qajet, ásirese mınıstrlik áreketteri barǵan saıyn muqııat baqylaýǵa alynyp jatqan kezde, — dedi Baspasóz erkindigi úshin reporterlar komıtetiniń saıasat jónindegi vıtse-prezıdenti Geıb Rottman.

Sonymen qatar túsirilgen shaǵymda Qorǵanys mınıstrligi men Hegsetten bólek, Pentagonnyń baspasóz hatshysy Shon Parnell de jaýapker retinde kórsetilgen.

Buǵan deıin Tramp ákimshiliginiń Wall Street Journal basylymyn prezıdenttik baspasóz pýlynan shyǵarǵany habarlanǵan.

Sondaı-aq Tramp The New York Times gazetin jala japty dep sotqa berdi.