The New York times Qytaıdaǵy qazaqtardyń tas dáýirindegi shańǵy jasaý dástúrin saqtaǵandyǵyn jazdy
ASTANA. QazAqparat - Qytaıdyń Altaı taýynda tirshilik keship jatqan qazaqtardyń arasynda neshe myńdaǵan jyldyq tarıhy bar shańǵy tebý dástúri qazirge deıin jalǵasyn taýyp otyr, dep habarlaıdy The New York times.
Munda taý shańǵy óneriniń qazirge deıin saqtalyp kele jatqany, sondaı-aq Altaı óńirinde meken etetin etnıkalyq qazaqtardyń shańǵyny qalaı jasaıtyndyǵy jáne kúni búginge deıin paıdalanatyny jóninde jan-jaqty aıtylǵan.
«Qazirgi kezde qazaqtar mekendeıtin Altaı taýynan budan 10 myń jyl burynǵy shańǵy dástúriniń tarıhı muralary jáne tasqa salynǵan sýretter tabyldy. Altaı taýy dep atalatyn bul óńir shyǵysy Mońǵolııaǵa, batysy Qazaqstanǵa deıin ulasyp jatyr. Halyqaralyq tájirıbeli mamandar men arheologtardyń aıtýynsha, shańǵy mádenıeti Skandınavııa taýlarynan emes, osy óńirden bastaý alǵan.
Mamandar sol óńirdegi shańǵy jasaýmen shuǵyldanatyn qazaq Meıirbek Qalaýbektiń úıine arnaıy baryp, shańǵy jasaý tehnıkasymen tanysty. Meıirbektiń aıtýynsha, ol birinshi samyrsyn butaqtaryn daıyndap alady, sodan soń olardy súrgilep, óńdep, sándeýge kirisedi. Aǵash butaqtarynan eki myqty ári tegis taqtaı daıyndap alady. Sodan soń ılengen jylqy terisin paıdalana otyryp, ystyq sýǵa salynǵan aǵash taqtaıdy maıystyrady. Eń sońynda jylqy terisin taqtaıdyń tabanyna baılap qoıady. Munyń artyqshylyǵy, jylqy terisimen qaptalǵan shańǵy tabany taýǵa shyqqanda keri syrǵanap ketýdiń aldyn alady. Budan basqa eki uzyn syryq alady, ol taýdan tómen syrǵanaǵanda kúshin únemdýge ári tıisti baǵytqa buryp otyrýyna kómektesedi»,- dep jazady The New York times saıty.
Avtor: Beısen Sultanuly
