The New York Times: Immýndyq júıemiz nege álsiz
ASTANA. QazAqparat - Ǵalymdar ımmýndyq júıeniń myqty bolýy nege baılanysty ekenine qatysty ortaq pikirge kele almaı júr. The New York Times basylymynyń jazýynsha, brıtan ǵalymdary gıgıena men densaýlyqtyń tyǵyz baılanysy baryn jazady.
«Kóp tujyrymdar adamnyń denesi ózine ne kerektigin biletinin aıtady da, tipti, bala balshyq jese de, ony qalypty kóredi. Biraq kúndelikti ómirde kópshiligi bakterııaǵa qarsy sabyn men dezınfektsııa jasaıtyn zattardy paıdalanbaıdy. Túptep kelgende olardyń barlyǵy antıbıotık kómegine júginýge májbúr bolady», - dep jazady basylym.
Avtor kóptegen dárigerler óz tájirıbesinde balalardyń tabıǵatpen etene jaqyn bolýyn, sondyqtan jerge túsken tamaqty kóterip jeýin qoldaıtynyn da tilge tıek etken.
«Mamandar zaman damyǵanymen, ımmýndyq júıemizdiń evolıýtsııaǵa ushyramaı qalǵanyn aıtýda. Al ol tabıǵatpen etene jaqyn bolýy kerek», - depti avtor.
Onyń aıtýynsha, búgingi kúni adamnyń qorǵanysh júıesiniń atqaratyn esh jumysy qalmaǵan.
«Ata-babalarymyz tiri qalý úshin qorshaǵan ortaǵa beıimdeldi. Adamzatta ekstremaldy problemalar boldy, tamaq jetispedi. Sý taza bolmady. Bakterııaǵa qarsy quraldar da bolmady. Bul tiri qalý úshin kerek qaýipti orta edi. Ol kezde ımmýndyq júıe adamnyń qorǵany boldy. Keıinirek adamdar óz qorǵanysyn arttyratyn túrli joldardy oılap tapty da, ártúrli dástúr qalyptastyrdy. Nátıjesinde adamdar qolyn jýyp, taza júrýge talpyndy. Ideıalar ósti, al ımmýndyq júıe damymady. Qorǵanysh júıesi qorshaǵan ortaǵa qaraı jumys isteıdi. Adam qaýipti jaǵdaıǵa tap bolǵanda ǵana onyń qorǵanysy myqty bola bastaıdy. Osylaısha adam qorshaǵan ortaǵa beıimdeledi», - deı kele avtor, qazirgi tańda ımmýndyq júıemizdiń jaýy az ekenin jazady.
The New York Times-tyń jazýynsha, kóp dári men antıbıotıkti kóp qoldany ımmýndy qjúıe úshin qaýipti de bolýy múmin. Sebebi olar aǵzadaǵy qajetti mıkrobtardy óltirýi yqtımal.
