The Finiko qarjy pıramıdasynyń basshysy Túrkııadan elge ekstradıtsııalandy
ASTANA. KAZINFORM — The Finiko qarjy pıramıdasynyń qurylymdyq bólimshesin basqarǵan kúdikti Túrkııadan Qazaqstanǵa ekstradıtsııalandy.
Qarjylyq monıtorıng agenttiginiń málimetinshe, kúdikti 2022 jyldan beri halyqaralyq izdeýde bolǵan. Ony elge prokýratýra organdarynyń úılestirýimen Interpoldyń Ulttyq ortalyq bıýrosy birlesip qaıtarǵan.
— Tergeý barysynda The Finiko eshqandaı naqty kásipkerlik nemese ınvestıtsııalyq qyzmet júrgizbegeni anyqtaldy. Buryn tartylǵan qatysýshylarǵa tólemder jańa salymshylardan túsken qarajat esebinen jasalǵan, — delingen habarlamada.
Osylaısha, tabys túsip jatqandaı áser qalyptastyryp, azamattardan jańa qarajat tartýǵa múmkindik alǵan.
Kúdiktiniń zańsyz áreketi saldarynan qarjy pıramıdasyna salymshylardyń 160 mln teńgeden astam qarajaty tartylǵan. Sonymen qatar sotqa deıingi tárkileý aıasynda kúdiktige tıesili quny 221 mln teńge bolatyn jer telimi memleket kirisine alyndy.
Buǵan deıin osy qylmystyq is boıynsha úsh adam sottalyp, olardyń múlki tárkilengen. Olar alty jylǵa deıin bas bostandyǵynan aıyrylǵan.
Qazir tergeý jalǵasyp jatyr. Іstiń ózge mán-jaılary Qylmystyq-protsestik kodekstiń 201-babyna sáıkes jarııa etilmeıdi.
Eske salaıyq, buǵan deıin asa iri mólsherdegi alaıaqtyq jasady degen kúdikti Grýzııadan ekstradıtsııalanǵanyn habarlaǵanbyz.
