Tez ázirlenetin taǵamnyń zııan ekenin kópshilik bile bermeıdi - sala mamandary

ShYMKENT. QazAqparat – Shymkentte qala ákiminiń janyndaǵy halyq densaýlyǵyn qorǵaý máseleleri jónindegi Úılestirý keńesiniń otyrysy ótti, dep habarlaıdy QazAqparat tilshisi.

Jıynǵa keńes músheleri men qaladaǵy barlyq medıtsınalyq uıymdardyń basshylary qatysyp, týberkýlez aýrýynyń qazirgi jaǵdaıy men aldyn alý is-sharalaryn talqylady

Keńeste qala boıynsha týberkýlez aýrýshańdyǵyn tómendetýde atqarylǵan jumystar barysy baıandalyp, búgingi kúni sheshimin tappaı otyrǵan ózekti máseleler sóz boldy.

Sala mamandary jergilikti atqarýshy organdar mindetti túrde batsıllıarly týberkýlez túrimen aýyratyn naýqastarǵa áleýmettik kómek kórsetý qajettiligin, olarmen qarym-qatynasta bolǵan jáne aýrý juqtyrǵan mektep jasyndaǵy balalardy hımııalyq profılaktıka em-domyn qabyldaý kezinde ystyq tamaqpen qamtamasyz etý máselesin aıtyp ótti. Sonymen qatar durys tamaqtaný ındýstrııasyn damytýdaǵy ózekti problemalar talqylandy. Mamandardyń aıtýynsha, sońǵy kezde jastar tez daıyndalatyn taǵamdardyń jıi tutynady. Alaıda olardyń zııanyn bilmeı, kóp qoldanyp jatady.

Mundaı taǵamdardyń qatarynda fastfýd, dóner, ár túrli gambýrger, shaýrma, lavash, pıtstsa, qýyrylǵan qytyrlaq kartop, jáne t.b. bar. Sonymen qatar, osyndaı taǵamdardy daıyndaıtyn oryndar sany da jyl saıyn ósip keledi. Kóbine qoǵamdyq tamaqtaný oryndarynda maıly, kalorııasy, tuzy kóp taǵamdar daıyndalady. Bul halyq arasynda sozylmaly ınfektsııalyq emes aýrýlardyń (qan aınalymy aýrýlary, qant dıabeti, semizdik, t.b.) ósýiniń birden-bir sebepshisi bolyp otyr.

Osyǵan baılanysty memlekettik-jekeshelik seriktestikti qoldanyp tez daıyndalatyn taǵamdar ornyna salaýatty tamaqtaný ındýstrııasyn damytý qajettigi týyp tur. Sol arqyly otbasyǵa arnalǵan meıramhana, dıetalyq ashana qajettiligi, baıytylǵan undy keń qoldaný máselesi aıtyldy. Ony halyq arasynda túsindirý jumystaryn keń kólemde, buqaralyq aqparat quraly kómegin qoldana otyryp júrgizý usynyldy.

Basqosýda sondaı-aq, halyqty sportpen aınalysýǵa tartý men mektep oqýshysynyń dene belsendiligin arttyrý jaıy qamtyldy. Otyrys qorytyndysynda úılestirý keńesiniń tóraǵasy jáne qatysýshylar usynystaryn berip, tıisti sheshimder shyǵaryldy. Jaýapty sala basshylaryna tapsyrmalar berildi.