Teılor Svıft kontsertinde terakt jasaýdy josparlaǵan eki kúdikti qamaýǵa alyndy

ASTANA. KAZINFORM – Pop-juldyz Teılor Svıft kontsert bermekshi bolǵan Venadaǵy bos stadıon áli kúzet baqylaýynda  tur. Uıymdastyrýshylardyń aıtýynsha, kontsertke 100 myńǵa jýyq adam keledi dep boljanǵan. Bul týraly Euronews jazdy. 

Jarylǵysh zattar men sýyq qarý qoldaný arqyly shabýyl josparlanǵany anyqtalǵannan keıin Aýstrııa týryndaǵy úsh kontsert toqtatyldy. Aýstrııanyń barlaý agenttikteri eki kúdiktini ustady. Buǵan deıin aqparat quraldary taǵy úsheýi izdestirilip jatqanyn habarlaǵan, biraq bılik muny joqqa shyǵardy.

Bılik bas kúdiktiniń áleýmettik jelilerge salǵan sýretin jarııalady. Onda ol sýyq qarý jáne «Islam memleketi» (Qazaqstanda tyıym salynǵan) tobynyń sımvolıkasy bar fýtbolkamen sýretke túsken.

Tergeý qorytyndysy boıynsha, aty-jóni jarııalanbaǵan 19 jastaǵy aýstrııalyq ınternettegi ekstremızmge qyzyǵýshylyq tanytyp, terrorıstik topqa adal bolýǵa ant bergen.

Sheneýnikterdiń aıtýynsha, ol stadıon aımaǵynda aýqymdy shabýyl jasamaq bolǵan nıetin moıyndady jáne alǵashqy josparyn shilde aıynda júzege asyrýǵa kirisken.

17 jastaǵy ekinshi kúdikti stadıon mańynda ustaldy: birneshe kún buryn ol kontsertter kezinde qyzmet kórsetetin kompanııaǵa jumysqa kirgen.

Uıymdastyrýshylardyń aıtýynsha, stadıonda shamamen 65 myń, syrtynda taǵy 30 myń kórermen bolady dep josparlanǵan.