Testileý ortalyǵy basshysynyń ustalýy UBT-ǵa áser etpeıdi - BǴM
Eske sala keteıik, búgin Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik satyp alýdy ótkizý kezinde úlestes kompanııalardyń múddelerin qoldaǵany úshin QR BǴM Ulttyq testileý ortalyǵy basshylyǵyna qatysty sybaılas jemqorlyq shemasynyń joly kesilgenin habarlady.
«Atalmysh fakti bıylǵy ulttyq biryńǵaı testileýdi (UBT) ótkizý úrdisine esh áser etpeıdi. Qazirgi tańda Ulttyq testileý ortalyǵy shtatty rejimde jumys istep jatyr. Granttardy úlestirýdiń avtomattandyrylǵan júıesi árdaıym baqylaýda, ol qupııalylyq rejiminde jumys jasaıdy jáne adamı faktorǵa táýeldi emes» delingen habarlamada.
Búginde tergeý organdary Ulttyq testileý ortalyǵynyń dırektoryna qatysty sotqa deıingi tergeý jumysyn júrgizip jatyr.
«Dırektordyń kinásin sot anyqtaıdy. Bilim jáne ǵylym mınıstrligi sybaılas jemqorlyq kórinisterine tózbeýshilik qaǵıdasyn qoldaıdy» deıdi mınıstrliktiń baspasóz qyzmeti.