Testileý kezinde qaıtys bolǵan muǵalim júrek aýrýymen esepte turǵan
ALMATY. QazAqparat – Ulttyq testileý ortalyǵy búgin Almatydaǵy jekemenshik oqý oryndarynyń birinde testileý kezinde bolǵan qaıǵyly oqıǵadan keıin túsinik berdi, dep habarlaıdy QazAqparat tilshisi.
«Búgin, 14 sáýirde Almatydaǵy jekemenshik mektepterdiń birinde 1973 jyly týǵan muǵalim testileý kezinde qaıtys boldy. Er adam gıpertenzııalyq (gıpertonııalyq) aýrýyna baılanysty emhanada esepte turǵan. Qazirgi ýaqytta sot-medıtsınalyq saraptama júrgizilip jatyr»
delingen habarlamada.
Muǵalimder ulttyq biliktilik testin 2018 jyldan beri tapsyryp keledi. Ortalyq aqparaty boıynsha, bul - osy 4 jyldaǵy alǵashqy qaıǵyly jaǵdaı. Testileý ortalyqtarynda alǵashqy kómek kórsetý úshin dárigerlerdiń jumysyn baqylaý kúsheıtilmek.
«Bekitilgen sanatyna baılanysty 230 myńnan astam adam jyl saıyn jalaqysynyń 30-50% mólsherinde qosymsha tólemder alady. Osy rette attestatsııanyń ózi erikti sıpatqa ıe ekenin atap ótemiz. Pedagogter jalaqylaryna taǵy qosymsha aqy alý úshin testileýge jazylyp, osy protsedýradan ótedi. Eger test tapsyrýshy ózin nashar sezinse, testileý kúnin ózgertý múmkindigi beriledi»
, - dep habarlady Ulttyq testileý ortalyǵy.
Sondaı-aq, Almaty qalalyq bilim basqarmasy marqumnyń otbasyna kóńil aıtqany, barlyq qajetti kómek kórsetiletini málimdengen.
Buǵan deıin Almatyda ulttyq biliktilik testin tapsyryp jatqan muǵalimniń qaıtys bolǵany týraly jazǵan edik.
