Tesla Model Y L elektromobılderine JI-ge negizdelgen daýys kómekshileri paıda bolady
ASTANA. KAZINFORM — Tesla kompanııasy Qytaıdaǵy elektromobılderine degen suranysty arttyrý maqsatynda tek alty oryndyq Model Y L krossoverin shyǵarýmen shektelmeıdi. Kompanııa jergilikti tutynýshylardyń suranysyna beıimdelý úshin fırmalyq daýys kómekshisin qytaılyq tildik modelder arqyly jańartýǵa nıetti, dep jazdy Azertadj.
CnEVPost portalyna silteme jasaǵan AZERTADJ agenttiginiń habarlaýynsha, Tesla Model Y L kólikterindegi mýltımedııalyq júıe DeepSeek jáne ByteDance Doubao atty jasandy ıntellektke negizdelgen daýys kómekshilerin qoldaıtyn bolady. Bul sheshim ByteDance kompanııasyna tıesili Volcano Engine bultty platformasynda jumys isteıdi.
-
Doubao — kólik júıelerin basqarýǵa baılanysty qyzmettik suranystarǵa jaýap beredi,
-
DeepSeek — ártúrli taqyryptar boıynsha erkin suhbat júrgizýge múmkindik beredi.
AQSh-ta Tesla kompanııasynyń daýys ınterfeısi Ilon Mask basqaratyn xAI startapynyń sheshimderine negizdelgen. Al jańa Model Y L modelinde daýys kómekshini iske qosý úshin arnaıy qupııa sóz aıtý jetkilikti. Bul — Tesla-nyń basqa Qytaıǵa arnalǵan modelderinde tek róldegi dońǵalaqty basý arqyly ǵana iske qosylatyn kómekshimen salystyrǵanda jańashyldyq bolyp sanalady.
Aıta ketý kerek, Tesla bul salada jergilikti avtoóndirýshilerden biraz artta qalyp qoıǵan. Qytaılyq brendter ıntellektýaldy ınterfeısterdi tutynýshylardyń suranysyna qaraı áldeqashan beıimdegen.
DeepSeek negizindegi daýys kómekshilerin tek Tesla ǵana emes, sondaı-aq Zeekr, Dongfeng (Nissan, Voyah, M-Hero) jáne basqa da kóptegen brendter usynady.
Osy ýaqytta AQSh-ta Tesla Cybertruck pıkabynyń joǵarǵy nusqasynyń baǵasyn 15 000 dollarǵa kóterip, 114 990 dollarǵa deıin qymbattatty. Alaıda bul qosymsha soma tek beımaterıaldyq bonýstarǵa arnalǵan: satyp alýshyǵa FSD (Full Self-Driving) tolyq avtonomdy júrgizý júıesi jáne Tesla Supercharger stantsııalarynda tegin qýattandyrý quqyǵy beriledi.
Cybertruck-tyń basqa nusqalarynyń baǵasy ózgergen joq.
Eske sala keteıik, buǵan deıin Tramptyń kesirinen Tesla kompanııasy tek baj salyǵyna bola 300 mln dollar joǵaltqanyn jazǵan edik.