Tesla Masktyń ornyna jańa bas dırektor izdep jatyr

ASTANA.KAZINFORM — The Wall Street Journal basylymynyń habarlaýynsha, elektromobıl óndirýshiniń dırektorlar keńesi Tesla aktsııalarynyń quldyraýyna baılanysty Maskty aýystyrý kerek degen qorytyndyǵa kelgen, dep jazdy Anadoly agenttigi.

Tesla kompanııasynyń basqarmasy mıllıarder Ilon Masktyń ornyna jańa bas dırektordy izdeýge kiristi. Bul týraly Wall Street Journal jaǵdaımen tanys resmı derekkózderge silteme jasap habarlady.

Basylymnyń habarlaýynsha, elektromobıl óndirýshisiniń dırektorlar keńesi Tesla aktsııalary quldyraǵannan keıin ári ınvestor kóp ýaqytyn Aq úıdegi jumysyna arnaǵanyna  kóńilderi tolmaǵandyqtan Maskty aýystyrý qajet degen qorytyndyǵa kelgen.

Tesla basshylary jańa bas dırektordy tabý maqsatynda birneshe kompanııaǵa júgingen. Óz kezeginde Mask óziniń X áleýmettik jelisindegi akkaýntynda WSJ maqalasyn ádeıi jalǵan, sonymen qatar «etıkany óreskel buzý» dep atady.

Tesla dırektorlar keńesi de Ilon Masktyń bas dırektor qyzmetin jalǵastyra alatynyna senim bildirdi. Bul týraly kompanııanyń X áleýmettik jelisindegi akkaýntynda dırektorlar keńesiniń tóraǵasy Robın Denholm habarlady.

Ilon Masktyń AQSh prezıdenti Donald Tramp ákimshiligindegi qyzmeti Tesla ónimderine boıkot jarııalaýǵa jáne kompanııanyń AQSh-taǵy avtosalondarynyń aldynda narazylyq sherýlerine ákeldi.

Masktyń ımmıgratsııalyq zańdardy qataıtý jáne áleýmettik baǵdarlamalardy qarjylandyrýdy kúrt qysqartý týraly kóptegen málimdemeleri narazylyqtyń ósýine sebep boldy.

Elektromobıl jasaýshynyń baıandamasynan keıin Ilon Mask mamyr aıynan bastap memlekettik qyzmetke az ýaqyt jumsaıtynyn aıtty. Ol 30 mamyrǵa deıin Úkimettiń tıimdiligi departamentiniń (DOGE) basshysy qyzmetinen ketýi kerek.

Buǵan deıin habarlanǵandaı, Ilon Mask Tramp ákimshiligindegi jumys ýaqytyn qysqarýǵa nıetti.