Tesla Qytaıda esik tutqalaryna baılanysty 3 mln kóligin keri qaıtarady
ASTANA. KAZINFORM - Tesla Qytaıda esik tutqalaryndaǵy yqtımal aqaýǵa baılanysty shamamen 3 mln elektromobılin keri qaıtarady. Atalǵan aqaý tótenshe jaǵdaıda kóliktiń esigin ashýdy qıyndatýy múmkin. Bul Tesla kompanııasynyń Qytaıdaǵy tarıhyndaǵy eń iri keri qaıtaryp alý naýqany bolmaq, dep habarlaıdy reseılik TASS.
Kompanııa bul týraly Qytaı Halyq Respýblıkasynyń Naryqty retteý jónindegi memlekettik basqarmasyna habarlaǵan.
Keri qaıtaryp alý Qytaıda shyǵarylǵan Model 3 sedandaryna, sondaı-aq elge ımporttalǵan Model S jáne Model X kólikterine qatysty.
Keıbir avtokólikterdiń mehanıkalyq esik tutqalary salon bólshekterimen bir tústes bolyp keledi.
Sol sebepti olardy, ásirese jol-kólik oqıǵasy kezinde, tez taýyp paıdalaný qıyn bolýy múmkin.
Tesla esik tutqalaryn aıqynyraq etý úshin olarǵa túrli tústi japsyrmalar ornatýdy josparlap otyr.
Sonymen qatar kompanııa terezelerdi tótenshe jaǵdaıda túsirý júıesiniń baǵdarlamalyq jasaqtamasyn jańartady.
Taǵy bir keri qaıtaryp alý naýqany 2,73 mln Model Y jáne Model 3 kóligin qamtıdy.
Tesla avtopılotty paıdalaný kezinde júrgizýshiniń nazaryn baqylaıtyn júıeni jańartpaq.
Kompanııa Shanhaıdaǵy zaýytynda Model 3, Model Y jáne Model Y L úlgilerin shyǵarady.
Qytaıdaǵy kásiporynda Model 3 óndirisi 2019 jyly bastaldy.
2020 jyldyń qazan aıynan bastap bul modelder Eýropa elderine eksporttala bastady.
Buǵan deıin Tesla 2026 jyldyń birinshi toqsanynda álemdik elektromobılder naryǵyndaǵy kóshbasshylyq ornyn qaıta ıelengeni habarlanǵan bolatyn.
Qytaıdaǵy avtokólik óndirýshileri satyp alýshylardy tartý úshin tómen paıyzdy avtonesıeler men bastapqy deńgeıdegi modelderge qosymsha jabdyqtar usyný sııaqty yntalandyrý sharalaryn belsendi qoldanyp keledi.
Máselen, Tesla-nyń Qytaıdaǵy bólimshesi Model 3 jáne Model Y satyp alýshylarǵa bastapqy jarnadan keıin aıyna 2 myń ıýannan az tólem jasaýǵa múmkindik beretin, jyldyq mólsherlemesi 1,36 paıyz bolatyn jeti jyldyq nesıe usynǵan.
Osyǵan deiıin Tesla satylymy tómendep bara jatqany týraly jazdyq.
