Tesla Germanııada ushqyshsyz taksı óndirisine 3 mlrd eýro ınvestıtsııa salady

ASTANA. KAZINFORM – Amerıkalyq Tesla kompanııasy Germanııanyń Grıýnhaıde qalasyndaǵy zaýytyn keńeıtýge 3 mlrd eýro ınvestıtsııalaýdy josparlap otyr. Jańa óndiristik qýattar Cybercab ushqyshsyz taksılerin shyǵarýǵa arnalmaq, dep habarlaıdy BILD basylymy.

Avtomobıl
Foto: BILD

Avtokólik óndirýshisiniń josparyna sáıkes, Brandenbýrg federaldyq jerinde qosymsha óndiristik korpýs qurylysy 2027 jyldyń birinshi jartysynda bastalady. Al ushqyshsyz kólikterdi shyǵarý 2029 jyly iske qosylýy múmkin.

Keıin kásiporyn jylyna 1 mıllıonǵa deıin robotaksı óndire alady. Investıtsııalyq joba qosalqy nysandar salýdy jáne qosymsha tazartý qurylystaryn turǵyzýdy da qamtıdy.

Óndiristi keńeıtýge daıyndyq aıasynda Tesla birneshe júz mamandy jumysqa qabyldaýdy bastady. Kompanııanyń málimetinshe, sońǵy aılarda zaýyt qyzmetkerleriniń qataryna taǵy 2 myń adam qosylǵan. Qazanda kásiporynda shamamen 12 600 adam jumys istegen.

Buǵan deıin elektromobılderge suranystyń tómendeýine baılanysty Tesla Germanııadaǵy kásipornyn damytýdy keıinge qaldyrǵan edi. Endi kompanııa kólik óndirisin aptasyna 7 500 birlikke deıin arttyryp, akkýmýlıator elementterin shyǵarý qýatyn keńeıtýdi kózdep otyr.

Aıta keteıik, Tesla 2027 jyly Cybertruck óndirisin toqtatatynyn málimdedi.